Aıda Balaeva Ortalyq Azııa elderimen qandaı medıajobalar jasalatynyn aıtty
ASTANA. KAZINFORM — Qazaqstannyń telearnalary Qyrǵyzstanda, Ózbekstanda, Ázerbaıjanda jáne Tájikstanda habar taratady, bul arnalardyń parıtettik qatysý tizimi áli de keńeıedi. Bul týraly Mádenıet jáne aqparat mınıstri Aıda Balaeva Astanadaǵy II Ortalyq Azııa medıaforýmynda aıtty.
Sholpan-Ata qalasynda ótken Ortalyq Azııa memleketteri basshylarynyń Konsýltatıvtik kezdesýinde Qazaqstan Prezıdenti Qasym-Jomart Toqaev Ortalyq Azııa halyqtarynyń baı tarıhı jáne mádenı murasyn tanymal etý — birlesken jumystyń mańyzdy vektory ekenin atap ótken edi.
Osy jumys aıasynda Qazaqstan men Ózbekstan birlesip shyǵarǵan «Qorqyt ata» tarıhı teleserıalyn, Qyrǵyzstanmen birlesken «Qos qanat» telekópirin, Qazaqstan men Ózbekstan arasyndaǵy mádenı-gýmanıtarlyq yntymaqtastyqty keńeıtýge baǵyttalǵan «Zakovat» zııatkerlik oıynyn atap ótýge bolady.
− Mundaı tájirıbeni óńirdiń ortaq tarıhı tulǵalaryna, mádenı murasyna, týrıstik múmkindikteri men zamanaýı jetistikterine arnalǵan jańa birlesken medıajobalar jasaý arqyly keńeıte túsken jón dep sanaımyn. Bizdiń arnalar qazirdiń ózinde Qyrǵyzstanda, Ózbekstanda, Ázerbaıjanda jáne Tájikstanda habar taratady, biz olarmen arnalardyń parıtettik qatysý tizimin keńeıtý boıynsha jumys istep jatyrmyz, − dedi Aıda Balaeva forýmnyń ashylý saltanatynda.
Óńirde mádenı-gýmanıtarlyq baılanystar da josparly túrde nyǵaıyp keledi. Jyl saıyn Qazaqstanda Qyrǵyzstannyń, Ózbekstannyń, Tájikstannyń jáne Túrikmenstannyń mádenı kúnderi zor tabyspen ótkizilip júr.
Dál osylaı Qazaqstannyń da mádenı kúnderi atalǵan elderde ótkizilip keledi. Sonyń aıasynda birlesken kontsertter, kıno kúnderi, jastar forýmdary sııaqty birqatar aýqymdy is-shara ótedi.
− Dúnıejúzilik kóshpendiler oıyndary Ortalyq Azııa elderi úshin ortaq mádenı-tarıhı murany beıneleıtin biriktirýshi oqıǵaǵa aınaldy. Byltyrǵy qyrkúıek aıynda Astanadaǵy 5-shi Kóshpendiler oıyndaryna álemniń 89 elinen 2 800 qatysýshy jáne 700-den astam jýrnalıst keldi. Dúnıejúzilik oıyndardyń ashylý rásimi men basqa da sporttyq jarystardy Túrkııa, Reseı, Ázerbaıjan, Mońǵolııa, Ózbekstan, Túrikmenstan jáne Qyrǵyzstan elderi joǵary sapada taratty. Bul shara sporttyq jarys aıasynan asyp, búkil óńirden júzdegen myń kórermen men týrıstiń basyn qosqan kóshpeli mádenıettiń tamasha merekesine ulasty, − dedi Mádenıet jáne aqparat mınıstri.
Aıta keteıik, 16-17 sáýir kúnderi Ortalyq Azııa boıynsha medıa salasynyń mamandary Astanadaǵy forýmda bas qosady. Forýmǵa Qazaqstan, Ózbekstan, Qyrǵyzstan, Ázerbaıjan, Tájikstan, Túrikmenstan, Ulybrıtanııa, Qytaı, Qatar, Reseı jáne basqa da elderden 700-den astam delegat qatysyp jatyr.
Sonymen birge, Qazaqstan men Ózbekstan jýrnalısteri úshin baspasóz týrlary ótedi.