Aıda Balaeva onlaın platformalarda jalǵan jarnamanyń kóbeıip jatqanyna alańdaýshylyq bildirdi
ASTANA. KAZINFORM - Astanada Mádenıet jáne aqparat mınıstri Aıda Balaeva men Meta kompanııasynyń memlekettik saıasat jónindegi dırektory Sarım Álı Ázız kezdesti, dep habarlaıdy mınıstrliktiń baspasóz qyzmeti.
Taraptar Qazaqstannyń aqparattyq keńistiginde qaýipsizdikti qamtamasyz etý máselelerin talqylady.
Mınıstr medıa keńistiktegi, ásirese áleýmettik jeliler boıynsha aqparattyq qaýipsizdik salasynda birlesip atqarǵan jumys úshin alǵys bildirdi. Sonymen qatar, ol korporatsııa basshylyǵyna bul baǵyttaǵy sharany kúsheıtý týraly ótinish aıtty.
2025 jyldyń basynan beri QR Mádenıet jáne aqparat mınıstrliginiń monıtorıngi barysynda el zańnamasynyń 7 689 ret buzylǵany anyqtaldy, onyń ishinde Facebook jelisinde – 3 027, Instagram platformasynda – 4 662 quqyq buzýshylyq tirkelgen.
Sonymen qatar, mınıstrlik ókilderimen tyǵyz baılanys ornatqan Meta kompanııasy Facebook jelisinen 90%, Instagram platformasynan 51% zańǵa qaıshy kontent óshirgenin de atap ótken jón.
Aıda Balaeva onlaın platformalarda jalǵan jarnamanyń belsendi túrde kóbeıip jatqanyna erekshe alańdaýshylyq bildirdi.
«Mundaı tızerlik jarnamanyń derekkózi naqty kórsetilmeıdi, sondyqtan oǵan der kezinde den qoıý múmkin bolmaı tur», – dedi mınıstr.
Sondaı-aq, WhatsApp messendjerine de jeke toqtalyp ótti. Búginde ol da alaıaqtyq jáne jalǵan aqparat taratý quralyna aınalyp otyr.
Aıda Balaeva Meta ókilderinen atalǵan máseleler boıynsha tehnıkalyq sheshimder usynýdy jáne platformalardaǵy kontent moderatsııasyn kúsheıtýdi surady. Kezdesý qorytyndysy boıynsha taraptar kórsetilgen máselelerdi sheshýge baǵyttalǵan arnaıy jumys tobyn qurýǵa kelisti.
QR Mádenıet jáne aqparat mınıstrligi men Meta kompanııasy Qazaqstan aqparattyq keńistiginiń qaýipsizdigin qamtamasyz etý úshin qajetti sharalardy qabyldaıtynyn jetkizdi.
- Sonymen qatar, Mádenıet jáne aqparat mınıstrligi qazaqstandyqtarǵa ınternettegi saqtyq sharalaryn saqtaý qajettigin eskertedi. Esh jerge jeke derekterdi jarııalamaýǵa, aqparat kózderin tekserýge, senimdi qupııasózderdi qoldanýǵa, jiberilgen habarlamalarǵa muqııat bolýǵa jáne kúmándi áreket týraly habarlaýǵa shaqyrady, - delingen habarlamada.
Osyǵan deıin Básekelestikti qorǵaý agenttigi Antitrust aqparattyq portalyn ázirlep jatqany týraly jazdyq.