Aıda Balaeva: «Nur Otan» halyqpen jumysyn kúsheıtýi tıis
«Elbasynyń «Nur Otan» partııasy saıası keńesindegi sóılegen sózin zor yqylaspen tyńdadym. Ádettegideı partııa Kóshbasshysy tolyqtaı alǵanda apparatqa da, partııaǵa da qatysty bar ózekti kúntártibi men asa mańyzdy mindetterdi naqty aıqyndap berdi. Basty messedj - belsendi músheleri men jaqtastaryna arqa súıeıtin myqty partııa. Bul úshin Parlamenttegi partııalyq fraktsııa kúsheıtilip, jumystyń jańa formata belsendi túrde ilgerletiletin bolady», - dedi ol.
Osy oraıda, Aıda Balaeva Elbasymyzdyń partııa ashyq, adamdardyń senimin týdyratyn jáne qoǵammen únemi dıalogqa baǵdarlanǵan bolýy tıistigin atap ótkenin eske saldy.
«Kóp jaǵdaıda bul mindetter meniń búgingi jumysymda kórinis taýyp jatady. Jańa qyzmetke taǵaıyndalǵan sátten bastap azamattardy turaqty negizde ózim qabyldaımyn. Kóp jaǵdaıda adamdarǵa belgili bir kúrdeli jaǵdaıda qalaı durys qadam jasaý kerektigin tek túsindirý ǵana qajet. Saıası keńes múshesi retinde partııa memlekettik saıasattyń ózekti baǵyttaryn túsindirý, azamattardyń quqyqtyq saýattylyǵyn qalyptastyrý turǵysynan halyqpen jumysyn kúsheıtý qajet dep esepteımin», - dedi A.Balaeva.
Onyń paıymynsha, memlekettiń áleýmettik baǵdarlanǵandyǵyna qaramastan áleýmettik masyldyq úshin jaǵdaı jasaýǵa jol berýge bolmaıdy.
«Azamattardyń ál-aýqaty men el ekonomıkasynyń damýy basym mindet bolýy tıis. Búgin Elbasy da barlyq partııalastaryn dál osyǵan úndedi», - dedi ol.
Esterińizge sala ketsek, búgin elordadaǵy «Nazarbaev ortalyǵynda» Qazaqstannyń Tuńǵysh Prezıdenti – Elbasy Nursultan Nazarbaevtyń tóraǵalyǵymen ótken «Nur Otan» partııasy Saıası keńesiniń keńeıtilgen otyrysyna Memleket basshysy Qasym-Jomart Toqaev, Premer-Mınıstr Asqar Mamın, Senat Tóraǵasy Darıǵa Nazarbaeva, Májilis spıkeri Nurlan Nyǵmatýlın, Úkimet músheleri, partııanyń Májilistegi fraktsııasy, oblystardaǵy fılıaldardyń jetekshileri qatysty. Otyrys barysynda partııanyń saılaýaldy baǵdarlamasynyń júzege asyrylý barysy men sezd sheshimderiniń oryndalýy, partııalyq qaıta serpiltýdiń negizgi baǵyttary jáne Saıası keńes bıýrosy quramyn ózgertý máselesi qaraldy. Elbasy kóptiń kóńilin kúpti etken kezekten tys Májilis saılaýy, «Nur Otan-nanmyn» deýden buqpantaılaıtyn sheneýnikter, elimizdiń joǵary oqý oryndaryn jaılaǵan paraqorlyq, el ekonomıkasyn kóterý, jastar máselesi, aýyldardy kórkeıtý, partııa fraktsııasynyń jumysyn jandandyrý jaıynda keńinen sóz qozǵady.
Sondaı-aq, Nursultan Nazarbaev jasandy ıntellektini jan-jaqty damytýǵa múmkindik beretin zańnamalyq baza ázirleýdi, sondaı-aq, osy salany kásipkerlik jáne ǵylymı turǵydan qoldaý úshin ekojúıe qalyptastyrýdy usyndy.
«Partııanyń kúndelikti jumysyn aıtarlyqtaı jandandyrý kerek. Biz úlken derekter men jasandy ıntellekt múmkindikterin paıdalana otyryp, halyqtyń suranysyna aldyn ala jaýap berýdi úırenýimiz kerek», – dedi Elbasy.
