Aıda Balaeva Qazaq ulttyq drama teatryn 100 jyldyq mereıtoıymen quttyqtady

ASTANA. KAZINFORM — QR Premer-mınıstriniń orynbasary – mádenıet jáne aqparat mınıstri Aıda Balaeva Muhtar Áýezov atyndaǵy Qazaq ulttyq drama teatryn 100 jyldyq mereıtoıymen quttyqtady. Bul týraly Mádenıet jáne aqparat mınıstrligi málim etti. 

— Qurmetti dostar! Qazaq rýhanııatynyń qara shańyraǵy — Muhtar Áýezov atyndaǵy Ulttyq drama teatrynyń 100 jyldyq mereıtoıymen barshańyzdy quttyqtaımyn! Ǵasyr buryn «Eńlik-Kebekpen» ashylǵan qasıetti shymyldyq sodan beri talaı dáýirdi artqa tastap, ulttyń taǵdyrly kezeńderin, arman-muratyn sahna tilimen sóıletip keledi. Kıeli sahnada qazaq dramatýrgııasynyń injý-marjanyna aınalǵan «Abaı», «Qobylandy», «Qaragóz», «Aıman — Sholpan» jáne ózge de týyndylar sahnalandy. Óner oshaǵy Almatyǵa qonys aýdaryp, 1937 jyly akademııalyq mártebe aldy, keıin oǵan Muhtar Áýezovtiń esimi berildi. Búginde «Ulttyq» mártebege ıe teatr álemdik mádenı keńistikke batyl qadam jasap keledi. Teatr búginde ult ónerin órkendetip, dástúr sabaqtastyǵyn saqtap, úlken shyǵarmashylyq orda qalyptastyryp otyr. Teatr ujymyna zor densaýlyq, shyǵarmashylyq shabyt, óner jolynda jańa jetistikter tileımin, — delingen habarlamada.

Buǵan deıin Mádenıet jáne aqparat mınıstrligi birqatar BAQ-ta paıda bolǵan M.Áýezov atyndaǵy teatrdy qaıta jańǵyrtý jumystaryna qatysty aqparatqa túsinikteme bergen edi.