Aıda Balaeva Mıhaıl Dorofeevtiń týǵan-týystary men jaqyndaryna kóńil aıtty

NUR-SULTAN. QazAqparat – QR Aqparat jáne qoǵamdyq damý mınıstri Aıda Balaeva tanymal qazaqstandyq jýrnalıst Mıhaıl Dorofeevtiń qaıtys bolýyna baılanysty onyń jaqyndaryna, týystaryna jáne áriptesterine kóńil aıtty, dep habarlaıdy QazAqparat.

«Búgin tanymal BAQ-tardyń biri informburo.kz jetekshisi, ulttyq qoǵamdyq senim keńesiniń múshesi, jarqyn ári daryndy adam Mıhaıl Dorofeevtiń ómirden ozǵanyn estidim. Mıhaıldi jeke tanıtyn edim, onyń ómirden ozýy – otandyq jýrnalıstıka úshin óte aýyr qaza. Onyń kóptegen dostary boldy, bári ony jaqsy kórdi jáne qurmettedi, kásibı jáne adamı qasıetterin qadirledi. Bárimiz ony saǵynatyn bolamyz. Jeke óz atymnan jáne Aqparat jáne qoǵamdyq damý mınıstrliginiń atynan Mıhaıl Dorofeevtiń týystary men jaqyndaryna jáne áriptesterine qaıǵyra kóńil aıtamyn», - dep jazdy Aıda Balaeva Facebook jelisinde.

Buǵan deıin habarlanǵandaı , búgin Informburo.kz aqparattyq-saraptamalyq ınternet portalynyń bas redaktory Mıhaıl Dorofeev ómirden ozdy.