Aıda Balaeva men Janna Andreasıan mádenı yntymaqtastyqty keńeıtý máselesin talqylady
ASTANA. KAZINFORM – Armenııada Qazaqstannyń mádenı kúnderi ótip jatyr. Eki el arasyndaǵy joǵary deńgeıde uıymdastyrylǵan alǵashqy iri mádenı is-shara Memleket basshysy Qasym-Jomart Toqaevtyń Erevanǵa jasaǵan resmı sapary barysynda qol jetkizilgen kelisimderdiń nátıjesinde júzege asyp otyr.
Mınıstrlik málimetinshe, is-shara aıasynda Qazaqstan Mádenıet jáne aqparat mınıstri Aıda Balaeva Armenııa Respýblıkasynyń Bilim, ǵylym, mádenıet jáne sport mınıstri Janna Andreasıanmen kezdesti. Taraptar mádenı yntymaqtastyqtyń keleshegin talqylap, gýmanıtarlyq baılanystardy qaıta jańǵyrtyp, nyǵaıtýdyń mańyzdylyǵyna toqtaldy. Ásirese ádebıet, mýzyka, kıno jáne aqparat almasý salalaryndaǵy ekijaqty jobalardy keńeıtý qajettigi atap ótildi.
– Búgingi kezdesý mádenıet salasyndaǵy yntymaqtastyqqa serpin beredi dep oılaımyn. Bul kıno ǵana emes, kitaphana isi, mýzeıler, kontserttik uıymdardyń arasyndaǵy baılanys salalaryna da qatysty. Anımatsııalyq jáne derekti fılmderdi birlesip túsirý tetikterin qarastyrýymyz kerek. Sondaı-aq ádebıetimizdiń kórnekti ókilderiniń shyǵarmalaryn aýdarý múmkindikterin oılastyrǵan jón, – dedi Aıda Balaeva.
Kezdesýde ártisterdiń ózara gastroldik týrlaryn uıymdastyrý, jas oryndaýshylardyń qatysýymen birlesken kontsertter ótkizý, aqparattyq agenttikter arasyndaǵy yntymaqtastyqty damytý jáne fılmder, telehıkaıalar men derekti jobalardy qosa alǵanda medıakontent almasý sekildi naqty usynystar da aıtyldy. Mundaı almasýdyń mádenı mańyzymen qatar ekonomıkalyq áleýeti de bar ekeni atap ótildi.
– Birlesken kınoóndiris, teatr gastrolderi men kontsertter aıasynda yntymaqtastyqty damytýdyń áleýeti zor. Búgin fılmder kórsetilimi ótti, kórermen qazaqstandyq týyndylardy zor yqylaspen qabyldady. Barlyq josparlanǵan shara joǵary deńgeıde ótetinine senemin. Bul is-sharalar elderimiz arasyndaǵy qarym-qatynasty odan ári nyǵaıtýdyń taǵy bir qadamy bolmaq, – dedi Janna Andreasıan.
Mınıstrler ózara is-qımyldyń naqty josparyn ázirleý ıdeıasyn qoldady. Bul jospar salalyq komıtetter tarapynan pysyqtalyp, memleketaralyq deńgeıde bekitiletin bolady. Mundaı tásil Qazaqstannyń ózge eldermen yntymaqtastyǵynda sátti júzege asyrylyp keledi jáne ol qazaq-armıan mádenı baılanystaryn damytýda tıimdi qural bola alady. Ádebıet salasynda qazaqstandyq jáne armıan avtorlardyń shyǵarmalaryn ózara aýdarýǵa arnalǵan kitaptar tizimin jasaý týraly kelisimge qol jetkizildi. Bul rette aýdarma isine baspa úılerin tartý jáne ulttyq naryqta kitaptardy nasıhattaý máselesi de qarastyryldy.
Sonymen qatar armıan tarapy qazaqstandyq jazýshylardy Erevan kitap festıvaline qatysýǵa shaqyrdy. Kezdesý sońynda «Habar» agenttigi» AQ men Armenııanyń «Qoǵamdyq telekompanııasy» JAQ arasynda ózara túsinistik týraly Memorandýmǵa qol qoıyldy.
Taraptar Qazaqstan men Armenııa arasyndaǵy mádenı jáne aqparattyq dıalogty nyǵaıtýǵa baǵyttalǵan mazmundy, júıeli jáne ashyq jumys júrgizýge daıyn ekenderin bildirdi.
Aıta ketý kerek, Qazaqstan men Armenııa arasynda dıplomatııalyq qatynas ornaǵan sátten beri alǵash ret osyndaı aýqymdy ári resmı deńgeıdegi mádenı shara – Armenııadaǵy Qazaqstannyń mádenı kúnderi joǵary memlekettik dárejede ótkizilip otyr.
Іs-sharalar sharyqtaý 19 sáýirde Aram Hachatýrıan atyndaǵy kontsert zalynda ótetin Gala-kontsertpen qorytyndylanady.
Aıta keteıik, buǵan deıin Aıda Balaeva Ortalyq Azııa elderimen qandaı medıajobalar jasalatynyn aıtty.