Aıda Balaeva men Toılı Kýrbanov Halyqaralyq eriktiler jylyn ótkizý barysyn talqylady
ASTANA. KAZINFORM — Astanada Premer-mınıstr orynbasary — Mádenıet jáne aqparat mınıstri Aıda Balaeva BUU Eriktiler baǵdarlamasynyń atqarýshy úılestirýshisi Toılı Kýrbanovpen kezdesti.
Kezdesýde Halyqaralyq volonterler jyly aıasynda atqarylǵan birlesken jumystyń nátıjeleri qaralyp, Qazaqstan men BUU Eriktiler baǵdarlamasy arasyndaǵy yntymaqtastyqty odan ári damytýdyń negizgi baǵyttary talqylandy.
Aıda Balaeva birlesken bastamalardy júzege asyrýǵa qosqan úlesi úshin Toılı Kýrbanov pen onyń komandasyna alǵys bildirdi. Ol Qazaqstan Halyqaralyq volonterler jylyn jarııalaý jóninde bastama kótergen el retinde óz maqsat-mindetterin halyqaralyq deńgeıde ilgeriletýge belsendi atsalysyp kele jatqanyn atap ótti. Sondaı-aq Úkimet basshysynyń orynbasary Memleket basshysy volonterlik qozǵalysty damytýǵa aıryqsha mán beretinin aıtty.
— Qazaqstandaǵy volonterlik qozǵalys Prezıdenttiń jan-jaqty qoldaýyna ıe. Memleket basshysy 2019 jyly 2020 jyldy Volonter jyly dep jarııalaǵannan keıin bul baǵyt tyń serpin alyp, qarqyndy damı tústi. Búginde volonterliktiń san alýan salany qamtyp, jas ereksheligine qaramastan adamdardy ortaq iske jumyldyrýy erekshe mańyzdy. Onyń qoǵamdaǵy aıryqsha máni jańa Konstıtýtsııamyzdan da kórinis tapty. Volonterlik qyzmet mártebesiniń konstıtýtsııalyq deńgeıde bekitilýi memlekettik qoldaý sharalaryn keńeıtýge jáne osy salany damytý tásilderin jetildirýge jańa múmkindikter ashady. Prezıdentimizdiń bastamasymen jarııalanǵan Halyqaralyq volonterler jyly adamdar men qaýymdastyqtardy ortaq maqsattar men qundylyqtar, qoǵam ıgiligine qyzmet etý muraty tóńireginde biriktirgen taǵy bir mańyzdy qadam boldy, — dedi Aıda Balaeva.
Kezdesýde Qazaqstan Halyqaralyq eriktiler jylyn jekelegen is-sharalar jıyntyǵy retinde ǵana emes, volonterlikti damytýdyń uzaqmerzimdi tetikterin qalyptastyrýǵa múmkindik beretin mańyzdy bastama retinde qarastyratyny atap ótildi.
Osyǵan baılanysty Aıda Balaeva volonterlerdi tirkeýge, olardyń mártebesin aıqyndaýǵa jáne qyzmet baǵyttaryn júıeleýge arnalǵan biryńǵaı halyqaralyq portal qurý múmkindigin qarastyrýdy usyndy.
Mádenıet jáne aqparat mınıstrligi málimetinshe, mundaı resýrs volonterler qaýymdastyǵynyń naqty úlesin baǵalaýǵa, suranys joǵary jáne jetkilikti damymaǵan baǵyttardy anyqtaýǵa, birlesken jumysty tıimdi úılestirýge, sondaı-aq volonterlerdi qoldaý, yntalandyrý jáne kótermeleý tetikterin jetildirýge múmkindik beredi.
Óz kezeginde Toılı Kýrbanov Qazaqstan Mádenıet jáne aqparat mınıstrligimen yntymaqtastyqtyń joǵary deńgeıin jáne Halyqaralyq volonterler jyly aıasyndaǵy júıeli ári úılesimdi birlesken jumysty atap ótti.
— Búginde volonterliktiń kóppolıýsti álemi qalyptasyp keledi. Qazaqstan — onyń negizgi ortalyqtarynyń biri. Bálkim, biz bul oqıǵanyń tarıhı mańyzyn áli de tolyq baǵamdap úlgermegen shyǵarmyz. Alaıda arada jyldar ótkende jurt munyń bári Halyqaralyq volonterler jylyn jarııalaýdy álemdik qaýymdastyqqa alǵash usynǵan Prezıdent Qasym-Jomart Toqaevtyń bastamasynan bastaý alǵanyn aıtady, — dedi BUU Eriktiler baǵdarlamasynyń atqarýshy úılestirýshisi.
Kezdesý sońynda taraptar Halyqaralyq eriktiler jyly aıasyndaǵy bastamalardy júzege asyrý, sondaı-aq volonterlik qozǵalysty odan ári damytý jáne qoldaý baǵytyndaǵy birlesken jumysty jalǵastyrýǵa daıyn ekenin bildirdi.
Aıta keteıik, 20 tamyzda Astanada Memleket basshysy Qasym-Jomart Toqaevtyń bastamasymen Táýelsiz Memleketter Dostastyǵy volonterleriniń alǵashqy forýmy ótedi.
Elde volonterlik qozǵalysty 2030 jylǵa deıin damytý jospary qaralǵanyn jazǵan edik.
