Aıda Balaeva mektepterdiń jańa oqý jylyna daıyndyǵyn erekshe baqylaýǵa alýdy tapsyrdy
ASTANA. KAZINFORM - Úkimette Qazaqstan Respýblıkasy Premer-mınıstriniń orynbasary – mádenıet jáne aqparat mınıstri Aıda Balaevanyń tóraǵalyǵymen bilim berý jáne balalardyń jazǵy demalysyn uıymdastyrý máseleleri boıynsha keńes ótti, dep habarlaıdy Úkimettiń baspasó qyzmeti.
Keńeste aldymen jańa oqý jylyna daıyndyq barysy qaraldy. Oqý-aǵartý mınıstri Juldyz Súleımenova balalarǵa áleýmettik qoldaý kórsetý jáne oqýshylardy qajetti mektep quraldarymen qamtamasyz etý jumystary týraly baıandady. Bul baǵyttaǵy tıisti jumystar elimizdiń barlyq óńirinde júrgizilip, turaqty baqylaýda ekeni atap ótildi.
Aıda Balaeva jańa oqý jylyna daıyndyq barlyq deńgeıde keshendi tásil men aıryqsha nazardy talap etetinin aıtty. Sondaı-aq negizgi mindetter qatarynda bilim berý ınfraqurylymynyń tolyq daıyndyǵyn qamtamasyz etý, mektepterdi qajetti resýrstarmen ýaqtyly jabdyqtaý, áleýmettik qoldaýdy qajet etetin otbasylardyń balalaryna kómek kórsetý máselelerin atady.
Premer-mınıstrdiń orynbasary josparlanǵan barlyq is-sharalardy sapaly ótkizýdi, aqparattyq-túsindirý jumystaryn kúsheıtýdi jáne atalǵan máselelerdi erekshe baqylaýda ustaýdy tapsyrdy.
Keńeste qaralǵan ekinshi másele – balalardyń jazǵy demalysy men saýyqtyrýyn uıymdastyrý, balalar saýyqtyrý ortalyqtaryndaǵy qaýipsizdikti qamtamasyz etý. Oǵan qatysty óńirler arasynda ozyq tájirıbe almasýǵa erekshe nazar aýdaryldy.
Bıyl 17,8 myń bala, onyń ishinde aýyldyq jerlerden 5 890 bala basqa óńirlerdegi saýyqtyrý ortalyqtaryna jiberilgen. Mundaı tásil qolda bar ınfraqurylymdy tıimdi paıdalanýǵa, balalardyń sapaly saýyqtyrý demalysyna qoljetimdiligin keńeıtýge jáne óńirler arasyndaǵy múmkindikter teńsizdigin azaıtýǵa yqpal etetini atap ótildi.
Sonymen qatar balalar saýyqtyrý ortalyqtarynyń qaýipsizdigi men lıtsenzııalanýy, sondaı-aq olardyń belgilengen talaptarǵa sáıkestigi jeke qaraldy. Búginde 131 balalar saýyqtyrý ortalyǵy lıtsenzııa alǵan.
Vıtse-premer balalardyń qaýipsizdigi sózsiz basymdyq bolyp qala berýge jáne turaqty baqylaýda bolýǵa tıis ekenin atap ótti. Bul tamaqtanýdyń sapasy men qaýipsizdiginen bastap, balalardy tasymaldaý talaptarynyń saqtalýyna, qoǵamdyq, sanıtarııalyq jáne órt qaýipsizdigine, sondaı-aq sý aıdyndary men adamdar kóp jınalatyn oryndardaǵy qaýip-qaterdiń aldyn alýǵa deıingi barlyq máseleni qamtıdy.
Aıda Balaeva profılaktıkalyq sharalardy kúsheıtip, vedomstvoaralyq ózara is-qımyldy jetildirý jáne osy jumysqa tartylǵan barlyq qyzmettiń jaýapkershiligin arttyrý qajettigin atap ótti.
Jazǵy saýyqtyrý naýqanyn qorytyndylaǵan Premer-mınıstrdiń orynbasary atqarylǵan jumystarǵa keshendi taldaý júrgizýdi, qabyldanǵan sharalardyń tıimdiligin baǵalaýdy jáne onyń nátıjelerin aldaǵy ýaqytta balalardyń demalysyn uıymdastyrý kezinde eskerýdi tapsyrdy.
Osyǵan deıin mektepterdiń jańa oqý jylyna daıyndyǵyna baqylaý kúsheıtilgeni týraly jazdyq.
