Aıda Balaeva medıtsınalyq qyzmet sapasyn júıeli baqylaýdy tapsyrdy
ASTANA. KAZINFORM – Qazaqstan Respýblıkasy Premer-mınıstriniń orynbasary — mádenıet jáne aqparat mınıstriniń mindetin atqarýshy Aıda Balaevanyń tóraǵalyǵymen medıtsınalyq-sanıtarııalyq alǵashqy kómek júıesinde kórsetiletin medıtsınalyq qyzmetterdiń sapasyn arttyrý máseleleri jóninde keńes ótti. Bul týraly Úkimettiń baspasóz qyzmeti habarlady.
Keńestiń basynda Aıda Balaeva Memleket basshysynyń erekshe nazar aýdarýynyń arqasynda densaýlyq saqtaý júıesin damytýǵa qomaqty qarajat bólinip, medıtsınalyq ınfraqurylym men qural-jabdyqtar kezeń-kezeńimen jańartylyp jatqanyn atap ótti. Soǵan qaramastan, kórsetiletin qyzmettiń sapasy áli de basty másele kúıinde qalyp otyr. Óńirlerde júıeli sheshimdi ári qoǵamdyq baqylaýdy kúsheıtýdi qajet etetin túıtkilder bar.
Azamattardyń ótinishterin saralaý negizgi máselelerdiń dáriger qabyldaýy men dıagnostıkalyq tekserýdi kútý merzimine, beıindi mamandarǵa qoljetimdilikke, patsıentterdi tıisti mamandarǵa baǵyttaýǵa, dári-dármekpen qamtýǵa jáne jekelegen densaýlyq saqtaý nysandarynyń jaı-kúıine qatysty ekenin kórsetti.
Densaýlyq saqtaý mınıstriniń mindetin atqarýshy Aqmaral Álnazarova vedomstvo medıtsınalyq-sanıtarııalyq alǵashqy kómekti uıymdastyrý tásilderin jetildirý jumystaryn jalǵastyryp jatqanyn aıtty. Bul baǵytta patsıentterdi qabyldaý múmkindigin keńeıtý, meıirger isin damytý, tsıfrlandyrý, ınfraqurylymdy jańǵyrtý jáne medıtsınalyq kómektiń sapasyn baqylaýdy kúsheıtý sharalary qolǵa alynǵan.
Sońǵy eki jylda ýchaskelik dárigerlerdiń qabyldaý ýaqyty tórt saǵattan alty saǵatqa deıin uzartyldy. Sonyń nátıjesinde dáriger qabyldaýyn kútý merzimi jeti kúnnen bir-úsh kúnge deıin qysqardy.
Kóptegen qyzmet tsıfrlyq júıege kóshirildi. Ýaqytsha eńbekke jaramsyzdyq paraqtary, retseptter jáne medıtsınalyq anyqtamalardyń 13 túri elektrondyq túrde rásimdeledi. Bul qaǵaz qujat aınalymy men patsıentterdiń qaıta júginý sanyn azaıtyp, dárigerlerge túsetin ákimshilik júktemeni tómendetýge múmkindik berdi.
MSAK deńgeıinde shuǵyl kómek kórsetý úshin sońǵy eki jylda 684 shuǵyl medıtsınalyq kómek kabıneti ashylyp, tórtinshi sanattaǵy shaqyrtýlarǵa qyzmet kórsetetin 988 mobıldi brıgada quryldy.
Aıda Balaevanyń tapsyrmasymen MSAK uıymdaryndaǵy pedıatrııalyq bólimshelerdiń jumysy kúsheıtilip, balalar densaýlyǵyndaǵy patologııalardy erte anyqtaýǵa arnalǵan 450-ge jýyq damý jáne erte aralasý kabıneti ashyldy.
Dári-dármekpen qamtý úderisi de tsıfrlandyrylyp jatyr. «Áleýmettik ámııan» servısi arqyly 9,6 mln elektrondyq retsept rásimdeldi. Bul — barlyq retsepttiń 86%-y. Satyp alýdy josparlaý ońtaılandyrylyp, 2027 jylǵa arnalǵan satyp alý rásimderi burynǵy jyldarmen salystyrǵanda tórt aıdan astam ýaqyt erte bastaldy. Tıisti tapsyrmany buǵan deıin Úkimet basshysynyń orynbasary bergen bolatyn. Sonyń nátıjesinde búginde medıtsınalyq uıymdardyń dári-dármekpen qamtylý deńgeıi 91%-ǵa jetti.
Sonymen qatar MSAK jumysynyń tıimdiligin aıqyndaıtyn basty kórsetkishterdiń biri — patsıentterdiń pikiri. 2026 jyldyń alǵashqy jartysynda MSAK uıymdaryna azamattar 62 mln ret júgingen, 2 925 shaǵym túsken. Shaǵymdardyń basym bóligi beıindi mamandarǵa qoljetimdilikke, qabyldaýǵa jazylý men patsıentterdi tıisti mamandarǵa baǵyttaýǵa, medıtsınalyq ádeptiń saqtalýyna, dıspanserlik baqylaýdyń ýaqtyly júrgizilýine jáne dári-dármekpen qamtýǵa qatysty boldy.
Shaǵym sanynyń eń joǵary ósimi Mańǵystaý oblysynda tirkelip, 4,3 ese artqan. Shyǵys Qazaqstan oblysynda bul kórsetkish — 2,6 ese, Qaraǵandy oblysynda — 2,3 ese, Aqmola oblysynda — 2,1 ese, al Astanada eki ese ósken.
Keńeste MSAK qyzmetkerlerin yntalandyrý júıesin jetildirý máselesi de jeke qaraldy. Jan basyna shaqqandaǵy normatıvtiń yntalandyrý bóligin avtomattandyrý tólemderdi bólýdegi sýbektıvtilikti azaıtyp, qarjylaı kótermeleýdi jumystyń naqty nátıjesine qaraı taǵaıyndaýǵa múmkindik berdi. Yntalandyrý tóleminiń ortasha mólsheri 600 myń teńge boldy. Bul 2024 jylmen salystyrǵanda 15%-ǵa kóp. Bıyl belgilengen kórsetkishterge qol jetkizgen myńnan astam ýchaskege 1 mln teńgeden joǵary tólem berildi.
Buǵan qosa, Premer-mınıstr orynbasarynyń mindetin atqarýshynyń tapsyrmasyna sáıkes, MSAK qyzmetkerlerine úzdiksiz eńbek ótili úshin yntalandyrý tólemderi engizilip jatyr. Bul profılaktıkalyq baǵdarlamalardyń sapasyn arttyrýǵa oń yqpal etýge tıis.
Keńes qorytyndysy boıynsha óńirlerde tájirıbeli dárigerlerdiń, máslıhat depýtattary men qoǵamdyq keńes músheleriniń qatysýymen arnaıy shtabtar qurý tapsyryldy. Olar memlekettik jáne jekemenshik emhanalar men statsıonarlardyń jumysyn jan-jaqty zerdelep, shaǵymdardyń túsý sebepterin anyqtaýǵa, sondaı-aq qyzmet kórsetý sapasy udaıy tómen medıtsınalyq uıymdar boıynsha naqty usynystar engizýge tıis.
Mańǵystaý, Shyǵys Qazaqstan, Qaraǵandy jáne Aqmola oblystaryndaǵy, sondaı-aq Astana men Almaty qalalaryndaǵy jaǵdaıǵa erekshe nazar aýdarý tapsyryldy. Atalǵan óńirlerdiń árqaısysy boıynsha tómen kórsetkishterdiń sebepterine jeke taldaý jasalýy qajet.
Sonymen birge MSAK qyzmetin baǵalaý júıesin Densaýlyq saqtaý mınıstrligi ázirlegen ındıkatorlarmen tolyqtyrý, úzdik medıtsınalyq uıymdardy yntalandyrý tetikterin jetildirý jáne úsh jyl qatarynan tómen nátıje kórsetip kele jatqan emhanalardy qarjylandyrý tásilderin qaıta qaraý tapsyryldy.
Patsıentterdiń baǵalaýyna arnalǵan jańartylǵan ındıkatorlardy eskere otyryp, medıtsınalyq qyzmetterge aqy tóleýdi retteıtin normatıvtik qujattarǵa ózgerister engizý mindeti qoıyldy. Patsıentterdi der kezinde aýrýhanaǵa jatqyzý men shuǵyl operatsııalardyń ýaqytyly jasalýyn qamtamasyz etý úshin kvota bólý tetikterin jetildirýge de erekshe nazar aýdarylmaq. Qabyldanǵan sharalar jaǵdaıdy jaqsartýǵa yqpal etpegen medıtsınalyq uıymdardyń basshylaryna qatysty tıisti basqarýshylyq jáne kadrlyq sheshimder qabyldaý tapsyryldy.
Keńesti qorytyndylaǵan Aıda Balaeva medıtsınalyq qyzmet sapasy jergilikti atqarýshy organdar men Densaýlyq saqtaý mınıstrliginiń udaıy ári júıeli baqylaýynda bolýǵa tıis ekenin erekshe atap ótti.
Aıta ketelik MÁMS júıesinde qarjylyq baqylaýdyń jańa modeli engizilgen edi.
