Aıda Balaeva mádenıet jáne aqparat salalaryn jańǵyrtýdyń basym baǵyttaryn belgiledi
ASTANA. KAZINFORM — Astanada Premer-mınıstrdiń orynbasary — Mádenıet jáne aqparat mınıstri Aıda Balaevanyń tóraǵalyǵymen mınıstrliktiń keńeıtilgen alqa otyrysy ótti.
Jıynǵa vıtse-mınıstrler, komıtet tóraǵalary, vedomstvolyq baǵynysty uıymdardyń jetekshileri jáne salalyq qurylymdardyń ókilderi qatysty. Otyrys barysynda mınıstrliktiń 2025 jylǵy qyzmetiniń qorytyndylary saralanyp, aldaǵy kezeńge arnalǵan strategııalyq basymdyqtar aıqyndaldy.
Alqa otyrysyn ashqan Aıda Balaeva Negizgi zańǵa engizilgen aýqymdy ózgeristerge erekshe toqtaldy. Ol ulttyq mádenıetti qoldaý men tarıhı-mádenı murany saqtaý máseleleri alǵash ret konstıtýtsııalyq deńgeıde memlekettiń irgeli damý qaǵıdattarynyń qataryna engizilgenin atap ótti.
Kezdesý barysynda mınıstrlik qyzmetiniń barlyq baǵyttary boıynsha jańa tásilder men zamanaýı damý úrdisteri jan-jaqty qaraldy. Salalardy ýaqyt talabyna jáne ózekti syn-qaterlerge saı júıeli jańǵyrtý qajettigine erekshe nazar aýdaryldy.
Sonymen qatar damyǵan memleketterdiń ozyq tájirıbesine negizdelgen jańa Konstıtýtsııa jobasy sóz bostandyǵyna kepildik beretinin, azamattardyń tsıfrlyq keńistiktegi quqyqtaryn qorǵaý jónindegi norma alǵash ret engizilgeni atap ótildi.
Osyǵan baılanysty Aıda Balaeva mınıstrlik pen vedomstvolyq baǵynysty uıymdardyń qyzmetine tsıfrlyq sheshimderdi keńinen engizý jáne jasandy ıntellekt tehnologııalaryn tıimdi paıdalaný máselesine aıryqsha toqtaldy.
Premer-mınıstrdiń orynbasary salanyń biryńǵaı ári keshendi tsıfrlyq damý strategııasyn ázirleýdi tapsyrdy.
Alqa otyrysyna qatysýshylar mádenıet salasyn damytý, kreatıvti ındýstrııalardy júıeli qoldaý, aqparattyq saıasatty jetildirý, azamattyq qoǵam ınstıtýttarynyń áleýetin arttyrý, sondaı-aq memlekettik jastar jáne otbasy saıasatyn tıimdi iske asyrý máselelerin talqylady.
Jıyndy qorytyndylaǵan Aıda Balaeva áriptesterine atqarylǵan nátıjeli jumys úshin rızashylyǵyn bildirip, ár baǵytta naqty bastamalar kóterip, jaýapkershilikpen áreket etýge shaqyrdy. Úkimet basshysynyń orynbasary vedomstvoaralyq ózara is-qımyldy kúsheıtýdi jáne qoıylǵan mindetterdiń sapaly ári merziminde oryndalýyn qamtamasyz etýdi tapsyrdy.
Aıta ketelik Aıda Balaeva qyzylshaǵa qatysty jaǵdaıdy erekshe baqylaýǵa alýdy tapsyrǵan edi.