Aıda Balaeva: Quqyqtyq júıeni jańǵyrtý — ýaqyt talaby

ASTANA. KAZINFORM — Jańa Ata zań halyqtyń senimi men múddesine negizdelgen qasterli Otanymyzdyń basty tiregi bolady. Bul týraly Konstıtýtsııalyq reforma jónindegi komıssııanyń otyrysynda QR Premer-mınıstriniń orynbasary — Mádenıet jáne aqparat mınıstri Aıda Balaeva málim etti.

— Biz qazir el damýynyń jańa kezeńine aıaq bastyq. Osyǵan oraı quqyqtyq júıeni jańǵyrtý, negizgi qaǵıdattardy zamanaýı talaptarǵa saı naqtylaý — ýaqyt talaby. Osy oraıda, jańa qujat el birligin nyǵaıtyp, memleketimizdiń turaqty damýyna zor úles qosary sózsiz, — dedi Aıda Balaeva.

Bul turǵyda ol Konstıtýtsııa tek quqyqtyq qujat qana emes, qoǵamnyń ortaq qundylyqtary men jaýapkershiligin aıqyndaıtynyn atap ótti.

— Sondyqtan jańa Ata zań halyqtyń senimi men múddesine negizdelgen qasterli Otanymyzdyń basty tiregi bolady dep senemin, — dedi Úkimet basshysynyń orynbasary.

Budan buryn habarlanǵandaı, Kazinform agenttiginiń qazaq jáne orys tilindegi Telegram arnasynda Konstıtýtsııalyq komıssııa otyrysynan mátin translıatsııasy bolady.