Aıda Balaeva kreatıvti ónimderdiń biryńǵaı marketpleısin qurýdy usyndy
ASTANA. KAZINFORM – Atalǵan usynysty QR Mádenıet jáne aqparat mınıtsri
2025 jylǵy 14 qarashada Tashkent qalasynda Ortalyq Azııa elderiniń mádenıet mınıstrleriniń alǵashqy kezdesýinde málim etti, dep habarlaıdy mınıstrliktiń baspasóz qyzmeti.
Aıta keteıik, jıynǵa Qazaqstan, Ózbekstan, Qyrǵyzstan, Tájikstan, Túrikmenstan mádenıet mınıstrlikteriniń basshylary, sondaı-aq qurmetti qonaq retinde Ázerbaıjannyń Mádenıet mınıstri qatysty.
Áriptesterine jyly lebizin bildirgen QR Mádenıet jáne aqparat mınıstri Aıda Balaeva bul alǵashqy kezdesýdiń Ortalyq Azııa elderi arasyndaǵy mádenı yntymaqtastyq tarıhyndaǵy mańyzdy kezeń ekenin atap ótti.
Onyń aıtýynsha, bul kezdesý óńir elderiniń mádenı baılanystaryn nyǵaıtyp, ózara yntymaqtastyqty jańa deńgeıge kóterýge degen ortaq umtylystyń aıqyn dáleli.
- Búginde aldymyzda mádenı keńistiktiń damýyna qosymsha serpin beretin naqty sharalar men bastamalardy kelisip qabyldaý mindeti tur, – dep atap ótti mınıstr.
Aıda Balaeva Ortalyq Azııanyń mádenı kúntizbesin ázirleý bastamasyn usyndy. Bul qujat óńirdegi mańyzdy mádenı sharalardy júıeleýge jáne biriktirýge múmkindik beredi.
Mınıstr sondaı-aq Ortalyq Azııanyń Mádenı týrne platformasyn iske qosýdy usyndy. Bul mehanızm óńirlik gastroldik baǵdarlamalardy, retrospektıvalyq kórmelerdi jáne arhıvtik fılmderdi mindetti túrde tsıfrlandyrýdy kózdeıtin aımaqaralyq kınokórsetilimderin jyl saıyn turaqty túrde ótkizýge múmkindik beredi.
Sonymen birge mınıstr ǵylymı jáne tarıhı yntymaqtastyqty damytý máselesine de erekshe toqtaldy.
- Ortalyq Azııa elderiniń ǵylymı, derekti jáne ádebı arhıvtik materıaldarynyń kóshirmelerimen almasý boıynsha aýqymdy ári ózara tıimdi yntymaqtastyq ornatý da paıdaly bolar edi. Óz tarapymyzdan bizde bar, sizderdiń elderińizge qatysty materıaldardy bólisýge daıynbyz. Mundaı almasý óńirdiń tarıhy men mádenıetin zertteýde kúsh biriktirýge, bar olqylyqtardy toltyrýǵa, jekelegen oqıǵalardyń jańa qyrlaryn ashýǵa, sondaı-aq kórnekti tulǵalardyń eńbegine neǵurlym tolyq ári obektıvti baǵa berýge múmkindik beredi, – dep atap ótti Aıda Balaeva.
Sóz sońynda mınıstr Ortalyq Azııanyń biryńǵaı tsıfrlyq platformasyn qurý múmkindigin qarastyrýdy usyndy. Bul zamanaýı kreatıvti ındýstrııalar marketpleısi qolónershilerdi, dızaınerlerdi, zergerlerdi jáne shyǵarmashylyq salanyń basqa da ókilderin nasıhattaýǵa arnalǵan orta bolmaq.
- Kezdesý qorytyndysy boıynsha taraptar odan arǵy yntymaqtastyqtyń negizgi mindetteri men baǵyttaryn aıqyndaǵan hattamaǵa qol qoıdy. Qujat aıasynda sondaı-aq «Ortalyq Azııanyń mádenı brendi» tujyrymdamasyn ázirleý boıynsha jumys tobyn qurý múmkindigin qarastyrýǵa kelisti, - delingen habarlamada.
Osyǵan deıin Máskeýde Qazaqstan men Reseı Federatsııasy arasyndaǵy mádenı-gýmanıtarlyq yntymaqtastyq jónindegi Kishi komıssııanyń tórtinshi otyrysy ótkeni týraly jazdyq.