Aıda Balaeva: Kreatıvti ındýstrııa ókilderi úshin arnaıy salyqtyq jeńildikter engizildi

ATYRAÝ. KAZINFORM – Kreatıvti ındýstrııa ókilderi úshin arnaıy salyqtyq jeńildikter engizilgen. Bul týraly Mádenıet jáne aqparat mınıstri Aıda Balaeva Ulttyq quryltaıdyń «Mádenıet. Óner. Rýhanııat» jumys sektsııasynyń jıynynda habarlady. 

Mınıstrdiń aıtýynsha, kreatıvti ındýstrııa qyzmetiniń 40 túri endi bólshek salyqtyń arnaıy salyq rejımi boıynsha jumys isteı alady.

«Kreatıvti bıznes jeke tabys, qosylǵan qun jáne korporotıvtik tabys salyqtarynan bosatylady. Jeke kásipker úshin 2-den 4%-ǵa deıin, JShS úshin 8%-ǵa deıin biryńǵaı salyq tóleıtin bolady. Al, memlekettik jastar saıasatynyń 2023-2029 jyldarǵa arnalǵan tujyrymdamasy bekitildi. Tujyrymdama sheńberinde jas kásipkerlerge jyldyq 2,5% jeńildikpen nesıe berý engizilip otyr. Osy kezge deıin 26 mlrd teńgeniń 5,5 myńnan astam joba qarjylandyryldy. Jumys oryndaryna 467 myń jas ornalastyryldy», - dedi Aıda Balaeva.

Onyń deregine súıensek, «Memlekettik jastar saıasaty týraly» zańǵa NEET sanatyndaǵy jastar uǵymyn bekitý bóliginde ózgerister engizilgen. 

«Bul jastardy jumysqa ornalastyrý, bilim berý, biliktiligin arttyrý boıynsha júıeli jáne ataýly jumysty júrgizýge múmkindik beredi. Qazir jastar saıasaty salasyndaǵy ındıkatorlardy kúsheıtý tetigi pysyqtalyp jatyr», - dedi mınıstr.

Eske sala ketelik, buǵan deıin Mádenıet jáne aqparat mınıstri Ulttyq quryltaı el damýynyń baǵytyn aıqyndaıtyn biregeı platformaǵa aınalǵany týraly pikir bildirgen bolatyn. 

Sondaı-aq, Qazaqstanda ótetin V Dúnıejúzilik kóshpendiler oıyndaryna 58 el qatysatynyn habarlaǵan edik.