Aıda Balaeva Qostanaı oblysynda kadrlyq áleýetti damytýǵa qatysty tapsyrma berdi
ASTANA. KAZINFORM – QR Premer-mınıstriniń orynbasary – Mádenıet jáne aqparat mınıstri Aıda Balaevanyń tóraǵalyǵymen Qostanaı oblysynyń áleýmettik salasyn damytý taqyrybynda jıyn ótti. Oǵan salalyq mınıstrlik basshylary men ókilderi, sondaı-aq oblys ákimi Qumar Aqsaqalov qatysty.
Úkimettiń baspasóz qyzmeti habarlaǵandaı, óńirdiń densaýlyq saqtaý salasynda birqatar mańyzdy kórsetkish boıynsha oń dınamıka baıqalady. Máselen, týberkýlezden bolatyn ólim-jitim deńgeıi 7,1%-ǵa tómendegen. Sonymen qatar sheshimin kútken máseleler de bar. Atap aıtqanda, ınterventsııalyq kómektiń qoljetimdiligin arttyrý, skrınıng sapasyn jaqsartý jáne kadrlyq áleýetti nyǵaıtý baǵytynda naqty sharalar qabyldaý qajet.
Oblystyń bilim berý júıesin damytý boıynsha da júıeli jumys júrgizilip jatyr. Óńirdegi 30 kolledjde 593 kásiporynnyń qatysýymen dýaldy oqytý júıesi sátti engizilgen. Mektepterde tsıfrlandyrý men jasandy ıntellekt tehnologııalary belsendi túrde qoldanylyp keledi. Sonymen qatar arnaıy pedagog kadrlar tapshylyǵyn joıýǵa baǵyttalǵan jumys atqarylyp jatyr.
Qostanaı oblysyndaǵy joǵary bilim berý salasy da turaqty oń ósimdi kórsetip otyr. Sońǵy úsh jylda stýdentter sany 15,3%-ǵa artqan. Halyqaralyq qos dıplomdy bilim berý baǵdarlamalary keńeıip, kadrlardy tájirıbege beıimdep daıarlaý kúsheıtilýde. KIA kompanııasymen yntymaqtastyqtyń nátıjesi de aıqyn kórinip otyr. «Avtomobıl ónerkásibiniń ınjınırıngi» baǵdarlamasy aıasynda oqyǵan 22 stýdenttiń 17-si búginde turaqty jumyspen qamtylǵan.
Sonymen qatar azamattardy turaqty jumys oryndaryna ornalastyrý deńgeıiniń tómendigi negizgi túıtkilderdiń biri retinde ataldy. Oblys ákimdigine osy baǵytta jumysty kúsheıtý tapsyryldy.
Óńirde búginde 580 mádenıet jáne arhıv mekemesi jumys isteıdi. Keıingi úsh jylda 31 nysan jóndeýden ótip, 5 jańa mádenıet mekemesi salynǵan. Degenmen mádenı ınfraqurylymdy jańǵyrtýǵa degen qajettilik áli de joǵary deńgeıde qalyp otyr.
Týrızm salasynda Qostanaı oblysynyń áleýeti zor bolǵanymen, týrıstik ınfraqurylymdy damytý máseleleri de ózekti. Sondaı-aq ınklıýzıvti sportty damytýǵa da erekshe nazar aýdarý qajettigi atap ótildi.
Keńes qorytyndysy boıynsha Premer-mınıstrdiń orynbasary birqatar naqty tapsyrma berdi. Atap aıtqanda, profılaktıkalyq jáne aqparattyq-túsindirý jumystaryn kúsheıtý, kadrlyq áleýetti damytý, sondaı-aq áleýmettik salanyń negizgi baǵyttary boıynsha keshendi sharalardy júzege asyrý tapsyryldy.
Aıta keteıik, óńir ákimi Qumar Aqsaqalov oblysta dáriger tapshylyǵy máselesin qalaı sheship jatqanyn aıtqan edi.