Aıda Balaeva: Qoǵamdyq keńesterdegi ashyqtyq qaǵıdaty tek qaǵaz júzinde qalmaýy tıis

ASTANA. KAZINFORM — Astanada XIІ Azamattyq forým aıasynda Qoǵamdyq keńesterdiń IV Respýblıkalyq májilisi ótti. Іs-sharaǵa Qazaqstan Respýblıkasynyń Mádenıet jáne aqparat mınıstri Aıda Balaeva, óńirlik jáne respýblıkalyq qoǵamdyq keńesterdiń músheleri, sarapshylar, halyqaralyq seriktester men azamattyq sektor ókilderi qatysty. Bul týraly Mádenıet jáne aqparat mınıstliginiń baspasóz qyzmeti málim etti. 

Óz sózinde mınıstr qoǵamdyq ınstıtýttardyń turaqty damyp, olardyń róliniń artyp kele jatqanyn atap ótti.

— Qoǵamdyq keńesterdiń tıimdi jumysy kóbine sizderdiń belsendi ustanymdaryńyz ben bastamashyldyqtaryńyzǵa baılanysty. Bul alańda sizder, Ulttyq quryltaı músheleri sııaqty, jergilikti deńgeıde kóterilgen ózekti máseleler men usynystardy talqylaýǵa bastamashy bola alasyzdar. Bul azamattardyń pikirin respýblıkalyq deńgeıge jetkizýdiń tıimdi joly, — dedi Aıda Balaeva.

Mınıstr halyqpen keri baılanysty nyǵaıtý jáne qoǵamdyq keńester ınstıtýtyn zamanaýı úrdisterge saı jetildirý qajettigin aıtty. Osy maqsatta ol keńesterdiń jumysynda tsıfrlyq tehnologııalar men jasandy ıntellekt múmkindikterin keńinen qoldanýdy usyndy. Sonymen qatar, Aıda Balaeva qoǵamdyq keńesterdiń parlamenttik reformalarǵa belsendi qatysýynyń mańyzdylyǵyn erekshe atap ótti.

— Prezıdent atap ótkendeı, bul másele qoǵamnyń keńinen qatysýyn, halyq pikirin jan-jaqty taldaý men zerdeleýdi qajet etedi. Sondyqtan qoǵamdyq keńesterdiń Konstıtýtsııa baptaryna tolyqtyrýlar men ózgerister engizý jónindegi usynystardy ázirleý protsesine tikeleı aralasýy mańyzdy dep sanaımyn, — dedi mınıstr.

Aıda Balaeva qoǵamdyq keńesterdiń jumys tıimdiligin arttyrý jáne qoǵamdyq baqylaýdy kúsheıtý maqsatynda keńesterdiń halyq aldynda ashyq esep berý tájirıbesin engizýdi usyndy. Onyń aıtýynsha, «Qoǵamdyq keńester týraly» Zańda bekitilgen ashyqtyq pen aıqyndyq qaǵıdattary tek qaǵaz júzinde emes, is júzinde júzege asýy tıis.

Aıda Balaeva qoǵamdyq baqylaýdyń tek jekelegen máselelermen shektelmeýine de nazar aýdarý qajetin atap ótti. Onyń pikirinshe, bul baǵyt Prezıdenttiń bastamalary men ulttyq jobalarynyń («Zań jáne tártip», «Taza Qazaqstan», «Adal azamat» jáne t. b.) iske asyrylýyn júıeli túrde monıtorıngteý men ilgeriletýge baǵyttalýy tıis. Bul jumysqa qoǵam ókilderin keńinen tartý qajet.

Búginde Qazaqstanda 263 qoǵamdyq keńes quramynda 4000-nan astam belsendi azamat eńbek etýde. Sońǵy úsh jylda olar azamattardyń quqyqtary men bostandyqtaryna qatysty 9000-nan astam normatıvtik-quqyqtyq aktiler jobasyn qarastyrǵan. Sondaı-aq, 2100 memlekettik organ basshysynyń esepteri tyńdalyp, 820 qoǵamdyq tyńdaý uıymdastyrylǵan. Budan bólek, áleýmettik qorǵaý, jer qatynastary, densaýlyq saqtaý jáne basqa da máseleler boıynsha 2000-nan astam azamattyń ótinishteri qaralǵan.

Eske sala keteıik, buǵan deıin Aıda Balaeva elimizde 49 eskertkish zań talaptaryn saqtamaı ornatylǵanyn aıtqan edi.