Aıda Balaeva qyzylshaǵa qatysty jaǵdaıdy erekshe baqylaýǵa alýdy tapsyrdy
ASTANA. KAZINFORM - Úkimette Premer-mınıstrdiń orynbasary – mádenıet jáne aqparat mınıstri Aıda Balaevanyń tóraǵalyǵymen juqpaly aýrýlardyń taralýyna qatysty keńes ótti. Onda qyzylshanyń taralý máselesi jeke qaraldy, dep habarlaıdy Úkimettiń baspasóz qyzmeti.
Densaýlyq saqtaý mınıstrliginiń málimetinshe, ótken jylda qyzylshaǵa shaldyǵý deńgeıi 2024 jylmen salystyrǵanda 85%-ǵa tómendegen. Sonymen qatar jyl basynan beri el aýmaǵynda qyzylshanyń 1 951 jaǵdaıy tirkelgen. Aýrýshańdyqtyń eń joǵary kórsetkishteri Astana men Almaty qalalarynda, sondaı-aq Jambyl jáne Atyraý oblystarynda baıqalady. Atalǵan jaǵdaılardyń basym bóligi 5 jasqa deıingi balalar arasynda tirkelgen. Aýrýǵa shaldyqqandardyń kópshiligi – vaktsına almaǵan balalar. Onyń ishinde ekpeden bas tartý sebepti egilmegender de bar ekeni atap ótildi.
Keńes barysynda qyzylsha boıynsha syrqattanýshylyq deńgeıi joǵary óńirlerdiń ákim orynbasarlarynyń baıandamalary tyńdaldy.
Premer-mınıstrdiń orynbasary óńirlik shtabtar deńgeıinde qyzylsha boıynsha epıdemıologııalyq ahýaldy kún saıyn taldap otyrýdyń mańyzdylyǵyn atap ótip, jergilikti jerlerdegi basshylardyń jeke jaýapkershiligine erekshe nazar aýdardy.
Sondaı-aq profılaktıkalyq ekpemen qamtý máselesi jeke qaraldy. Birqatar óńirlerde josparly kórsetkishterge qol jetkizilmegeni aıtyldy. Ásirese Mańǵystaý oblysynda negizgi vaktsınalardyń barlyq túri boıynsha qamtý deńgeıi tómen kúıinde qalyp otyr. Mundaı alshaqtyqtar ınfektsııalyq aýrýlardyń taralý qaýpin kúsheıtetindikten, bastapqy medıtsınalyq-sanıtarııalyq kómek deńgeıinde nysanaly jáne júıeli jumysty kúsheıtý qajettigi atap ótildi.
Keńes qorytyndysy boıynsha Aıda Balaeva qyzylshaǵa qatysty epıdemıologııalyq ahýaldy erekshe baqylaýǵa alýdy, sondaı-aq halyq arasynda ımmýndaýdyń mańyzdylyǵy jónindegi aqparattyq-túsindirý jumystaryn jandandyrýdy tapsyrdy. Bul baǵyttaǵy jumysty, eń aldymen, Mańǵystaý oblysynda kúsheıtý qajet ekeni aıtyldy.
Osyǵan deıin mınıstrlik ókilderi qyzylsha men tumaý áli tirkelip jatqanyn málimdegen bolatyn.