Aıda Balaeva kıiz úıde jartylaı jalańash bılegenderdiń vıdeosyna qatysty pikir bildirdi
ASTANA. KAZINFORM — LGBT ókilderiniń kıiz úıde jartylaı jalańash bılegen vıdeosy áleýmettik jelide tarap ketti. Qasıetti qara shańyraqty beıádep qylyǵymen masqaralaǵandardyń áreketi jeli qoldanýshylarynyń ashýyn keltirdi. Búgin Mádenıet jáne aqparat mınıstri Aıda Balaeva osy beıne jazbaǵa qatysty Facebook paraqshasynda pikir bildirdi.
«Qurmetti dostar! Ózderińizge málim, Ata zańymyzda barlyq azamattyń quqyǵy teń, olardyń ar-namysy men qadir-qasıetin qurmetteýge kepildik berilgen. BAQ pen áleýmettik jelilerdiń mańyzy arta túsken qazirgi kezde qandaı kontent jasalyp, bólisilip jatqanyna erekshe muqııat bolýymyz kerek. Adamdardyń kóńiline qaıaý salyp, mádenı jáne ulttyq bolmysymyzǵa syzat túsiretin jazbalar men beınerolıkterge jol berilmeıdi», - dep jazdy mınıstr.
Aıda Balaeva QR Mádenıet jáne aqparat mınıstri retinde kıiz úıde bı bılep, beıádep áreketimen qoǵam nazaryn aýdartqan beınerolık týraly aıtqysy keletinin jazdy.
«Mundaı kontent qoǵamda alaýyzdyq týdyrýy múmkin. Arandatýshylyqqa da uryndyrýy yqtımal. Árıne, óskeleń urpaq tárbıesine keri áserin tıgizedi. Vıdeonyń mazmuny qazaq halqynyń qundylyqtary men salt-dástúrlerine qaıshy keledi.Taǵy bir másele óte mańyzdy. Memlekettik áleýmettik tapsyrystar dástúrli qundylyqtarymyzdy saqtaý men nasıhattaýda erekshe jaýapkershilikti talap etedi. Ulttyq qundylyqtardan bas tartý mádenıetimizge, salt-dástúrimizge jáne ádet-ǵuryptarymyzǵa qashan da qaýip tóndiredi. Al birligimiz ben turaqtylyǵymyzdyń myzǵymas negizin saqtaý — ortaq paryzymyz», - dep jazdy Aıda Balaeva.
Ol sondaı-aq, medıa-protsesste júrgen barsha adamdardy kontent jasaýda muqııat bolýǵa shaqyrdy.
«Kez kelgen shyǵarmashylyq jumysta ulttyq salt-dástúr men qundylyqtardy qurmetteýge basymdyq tanytý kerek. Judyryqtaı jumylyp, birlese jumys istep qana halqymyzdyń basyn biriktirip, bólshekteýge bolmaıtyn baı mádenı muramyzdy saqtap qala alamyz», - dedi ol.
