Aıda Balaeva qazaqstandyqtardy Otbasy kúnimen quttyqtady
ASTANA. KAZINFORM — Qazaqstanda 6,2 mıllıonnan astam otbasy ómir súrip jatyr, dep jazdy Mádenıet jáne aqparat mınıstri Aıda Balaeva Facebook-ke jarııalaǵan quttyqtaýynda.
Mınıstrdiń sózinshe, bul júrekke jyly mereke otyz jyldan astam ýaqyt boıy otbasy atty eń qasterli qundylyqty eske salyp, nasıhat etip keledi. Birikken Ulttar Uıymynyń bastamasymen bekitilgen bul kún — árbir adam úshin mańyzdy máselelerge nazar aýdarýǵa, ıaǵnı qamqorlyq, qoldaý, mahabbat jáne balalarymyzdyń jarqyn bolashaǵy sekildi izgi qundylyqtardy ulyqtaýǵa múmkindik beredi.
— Búginde Qazaqstanda 6,2 mıllıonnan astam otbasy ómir súrýde. Memleket úshin otbasyn qoldaý — jaı ǵana basymdyq emes, bul — turaqty damýdyń berik negizi. Elimizde ana men balany qorǵaýǵa erekshe mán berilip, qaýipsiz ári laıyqty ómir súrýge barlyq jaǵdaı jasalyp jatyr. Bul rette jańa ǵana shańyraq kóterip jatqan jas otbasylarǵa erekshe kóńil bólip, qoldaý kórsetý mańyzdy. Áıelder men balalardyń quqyǵyn qorǵaýǵa baǵyttalǵan zańnama jetildirilip keledi. Qoldaý tek sóz júzinde ǵana emes, áleýmettik járdemaqylar men bala kútimine arnalǵan tólemder arqyly naqty kórinis taýyp jatyr. Búginde elimizde 112 Otbasy qoldaý ortalyǵy jumys isteıdi. Bul ortalyqtar azamattarǵa ómirlik mańyzdy máselelerdi sheshýge kómektesip, psıhologııalyq, quqyqtyq jáne áleýmettik kómek kórsetip otyr, — dep atap ótti Balaeva.
Mádenıet mınıstri otbasy — qoǵamnyń tek bir bólshegi ǵana emes, bul — bizdi jaqsy kóretin, túsinetin, qabyldaıtyn aıaýly meken ekenin aıtty.
— Dál osy jerde tulǵalyq qasıetimiz qalyptasyp, qundylyqtar men armandarymyzdyń irgetasy qalanady. Otbasy berik bolsa — memleket te qýatty bolady. Balalaryn súıispenshilikpen tárbıelep otyrǵan, otbasylyq dástúrdi uqyppen saqtap, urpaqtan-urpaqqa jetkizip kele jatqan árbir janǵa shynaıy alǵysymdy bildiremin. Sizder — elimizdiń tiregi, jarqyn bolashaqtyń negizisizder. Barsha otbasyǵa shýaqty ómir, myqty densaýlyq, jylylyq pen baq-bereke tileımin. Ár shańyraqta qýnysh pen shattyq mol bolsyn! — dep izgi tilegin bildirdi vedomstvo basshysy.
Búgin «Mereıli otbasy» ulttyq baıqaýyna ótinim qabyldaý bastalady.
— Qazaqstannyń ár óńirinde ózgelerge úlgi bolatyn, taǵylymdy tarıhy bar otbasylar bar ekenine senimdimin. Barshańyzdy osy mańyzdy ári izgi baıqaýǵa qatysýǵa shaqyramyn. Sizderdiń ómirlik tájirıbelerińiz kópshilikke shabyt syılaıtyny sózsiz. Sonymen qatar, sizderdi Otbasy kúnine arnalǵan onlaın-chellendjge qatysýǵa shaqyramyn! #otbasykúni2025 jáne #densemı2025 heshtegterimen júrekke jyly fotolaryńyzdy, otbasylyq tarıh pen dástúrlerińizdi bólisińizder. Ónegeli ómirler, berekeli otbasylar barshamyzǵa úlgi! — dep túıindedi Aıda Balaeva.
Buǵan deıin Aıda Balaeva «Qazaqfılm» tóńiregindegi daýǵa qatysty pikir bildirdi.