Aıda Balaeva: Qazaqstanda volonterlikti memlekettik qoldaýdyń birtutas júıesi qalyptasty
ASTANA. KAZINFORM — Búgin QR Premer-mınıstriniń orynbasary – mádenıet jáne aqparat mınıstri Aıda Balaeva eriktilerdi merekesimen quttyqtady. Bul týraly Mádenıet jáne aqparat mınıstrligi málim etti.
– Qurmetti volonterler! Qurmetti dostar! Sizderdi Halyqaralyq volonterler kúnimen shyn júrekten quttyqtaımyn! Qazirgi kezde volonterlik qozǵalys elimizdegi qoǵamdyq ómirdiń ajyramas bóligine aınaldy. Sizder mádenıet pen bilim, ekologııa men medıtsına, áleýmettik qoldaý men qaıyrymdylyq salalarynyń damýyna úles qosyp kelesizder. Keıingi jyldary Qazaqstanda volonterlikti memlekettik qoldaýdyń birtutas júıesi qalyptasty, ol árqashan memlekettik saıasattyń nazarynda, – dedi mınıstr.
Aıda Balaeva dál búgin BUU-nyń Nıý-Iork qalasyndaǵy Shtab-páterinde Ornyqty damý jolyndaǵy Halyqaralyq volonterler jyly resmı bastaýyn alǵanyn aıtty.
– Atalǵan jyldy jarııalaý týraly usynys Qazaqstan Respýblıkasynyń Prezıdenti Qasym-Jomart Kemeluly Toqaevtyń bastamasymen júzege asqanyn maqtan tutamyz. Qazaqstan úshin Halyqaralyq jyl ornyqty damý maqsattaryn iske asyrýdaǵy volonterlerdiń róline basa nazar aýdara otyryp «Birge – turaqty bolashaq úshin!» uranymen jaqsylyq pen birliktiń jalpyhalyqtyq merekesine aınalady. Ataýly jyl jahandyq seriktestik rýhynda jańa múmkindikter ashatynyna jáne mıllıondaǵan adamdardy turaqty, ádil jáne beıbit álem qurýdyń ortaq isine qatysýǵa shabyttandyratynyna senimdimiz, – dedi ol.
Mınıstr memleket eriktilerdiń belsendiligin, azamattyq ustanymy ben jasampaz isterin joǵary baǵalaıtynyn aıtty.
– Biz volonterlik bastamalardy odan ári qoldaımyz jáne damý úshin múmkindikterdi arttyramyz. Barlyq volonterlerge elimizdiń damýyna qosqan úlesi, tabandylyǵy, meıirimdiligi men óz isine adaldyǵy úshin shyn júrekten alǵys aıtamyn. Sizderdiń ıgi isterińiz árqashan qurmet pen qoldaý taýyp, adamdarǵa qýanysh pen shattyq ákelsin. Sizderge zor densaýlyq, amandyq, kúsh-qýat jáne qoǵamǵa qyzmet etý jolynda tabys tileımin, – dedi QR Premer-mınıstriniń orynbasary – mádenıet jáne aqparat mınıstri Aıda Balaeva.
Aıta keteıik, jaqynda «Jyl volonteri – 2025» halyqaralyq syılyǵynyń jeńimpazdary anyqtaldy.