Aıda Balaeva «Qazaqfılm» tóńiregindegi daýǵa qatysty pikir bildirdi

ASTANA. KAZINFORM – Mádenıet jáne aqparat mınıstri Aıda Balaeva Úkimet otyrysynan keıin ótken baspasóz máslıhatynda «Qazaqfılm» men «Qazaqanımatsııa» mekemeleriniń tóńiregindegi daýǵa pikir bildirdi.

- Áleýmettik jelide Erlan Tóleýtaı sııaqty kıno mamandary bastaǵan top pen sizdiń arańyzda «Qazaqfılm» jáne «Qazaqanımatsııa» mekemeleriniń tóńireginde aıtys júrip jatqanyna biraz boldy. Sol azamattardy nege jeke qabyldaýyńyzǵa shaqyryp, ýájderin tyńdap kórmeısiz ? «Qazaqfılmniń» qazirgi basshysy qazaq tilin bilmeıdi degen synǵa qalyp otyr. Basshylyqty aýystyrý josparda bar ma, - dep surady BAQ ókili.

Aıda Balaeva «Qazaqfılm» sııaqty mekemeniń basshysyna eń birinshi kezekte qandaı talaptar qoıylatynyn aıtty.

- Eń birinshi menedjer basqarý kerek. Ol jerde, naqty «Qazaqfılmge qatysty aıtyp otyrmyn, rejısser de, akter de bolmaý kerek. Naqty menedjer bolý kerek. Dúrbeleńge salyp júrgen birneshe adam kezinde sol «Qazaqfılmde» jumys istegen. Biraq «Qazaqfılmniń» ońtaıly damýyna áser etetindeı jumys istemegen. Qazir olar joq jerden daý shyǵaryp júr. Men Azamat Satybaldy ketkennen keıin «Qazaqfılmniń» menedjmentin óz baqylaýyma alyp, jumysyna kúndelikti nazar aýdaryp otyramyn. Sonyń nátıjesinde búgin biz ol mekemeniń qarjylyq kórsetkishin oń nátıjege jetkizdik. Demek, tabys túse bastady. Al tabys túskeni damýǵa múmkindigi bar ekenin kórsetedi. Sondyqtan bul jerde nátıjeli jumys istep júrgen adamǵa «orys tilin bilmeısiń», «qazaq tilin bilmeısiń» dep tıise berý durys emes dep oılaımyn. Meniń oıymsha, olardyń «Qazaqfılm» molaǵa aınaldy» degen sózderi eshqandaı shyndyqqa saı kelmeıdi. Bárińizdi «Qazaqfılmniń» jumysymen tanysýǵa shaqyramyn, - dedi Aıda Balaeva.

Vedomstvo basshysy «Qazaqfılm» basshylyǵyna syn aıtyp júrgen kıno mamandaryn daý qýmaı, jumys isteýge shaqyrdy.

- Al ol azamattardy jeke qabyldaý máselesine kelsek, bul bitpeıtin daý ǵoı. Olardyń óz aqıqaty bar, bizdiń óz aqıqatymyz bar. Sondyqtan, meniń oıymsha, keshke deıin daý-damaıdyń basynda júrmeı, nátıjeli jumys kórsetýimiz kerek. Ondaı nátıje búginde bar. Ony men maqtanyp aıta alamyn, - dedi mınıstr.

Buǵan deıin mınıstr Aıda Balaeva «Qazaqfılm» jeriniń aınalasyndaǵy daýly málimdemelerdi teriske shyǵarǵan edi.