Aıda Balaeva: Kásibı jýrnalıstıkanyń damýyna múddelimiz

NUR-SULTAN. QazAqparat – Aqparat jáne qoǵamdyq damý mınıstri Aıda Balaeva «Astana Media Week 2020» ashylýynda sóz sóıledi, dep habarlaıdy QazAqparat tilshisi.

«Qazirgi ýaqytta bir adamnyń ózi ǵana aqparat kózine aınalatyn ýaqyt keldi. Ókinishke qaraı keıde osyndaı adam shynaıy aqparat bermeı, búkil eldi adastyrýy múmkin. Sol úshin kásibı jýrnalıstıkanyń damýyna múddelimiz. Osynaý mindet jańa tegeýrinderge qaraı kúrdelenip bara jatqanyn da atap ótý kerek. Men eń aldymen jýrnalıster shynaıy ári shuǵyl aqparattyń qanshalyqty mańyzdy ekenin túsinse deımin. Jalpy pandemııa aqparat salasyna óz áserin tıgizdi. ıAǵnı, jarnama berýshiler azaıyp, shyǵarylymdardyń danasy túsip ketti. Osyndaı jaǵdaıda kóptegen buqaralyq aqparat quraldary jabylýǵa májbúr boldy», - degen Aıda Balaeva.

Mınıstrdiń aıtýynsha qazirgi BAQ-tar arasynda oqyrman men kórermen yqylasyn aýdarý básekesi júrip jatyr.

«Sondyqtan árbir arna sapaly ári qyzyqty kontent jasaýdy oılaıdy. Áleýmettik jeliler arqyly jumysyn kórsetýge tyrysady. Bul rette bizdiń BAQ joǵary biliktiligi men básekege qabilettiligin kórsetip keledi. Olar ózderiniń aýdıtorııasy ár ýaqytta qyzyqty bolýyn tileımin», - deıdi Aıda Balaeva.

Eske sala ketsek elordada Astana Media Week 2020 ótip jatyr. Іs-sharanyń negizgi maqsaty – otandyq medıasalany damytý men ındýstrııadaǵy iskerlik qarym-qatynasty aımaqtyq jáne halyqaralyq deńgeıde ilgeriletý. Medıaaptalyq tórtinshi jyl qatarynan álemniń túpkir-túpkirinen jetekshi sarapshylardy dástúrli túrde jınap keledi jáne ózekti t aqyryptar talqylanady.