Aıda Balaeva Qaraǵandy óńiriniń áleýmettik damýyna qatysty tapsyrmalar berdi
ASTANA. KAZINFORM — Qaraǵandy qalasynda Qazaqstan Respýblıkasy Premer-mınıstriniń orynbasary – mádenıet jáne aqparat mınıstri Aıda Balaevanyń tóraǵalyǵymen óńirdiń áleýmettik salasyn damytý máseleleri qaraldy. Jıynǵa áleýmettik baǵyttaǵy salalyq mınıstrlikterdiń ókilderi jáne Qaraǵandy oblysynyń ákimi Ermaǵanbet Bólekpaev qatysty. Bul týraly Úkimet málim etti.
Densaýlyq saqtaý salasy boıynsha vedomstvo ókilderi medıtsınalyq qyzmettiń sapasy men alǵashqy medıtsınalyq kómektiń rólin arttyrýǵa basymdyq beriletinin atap ótti. Sonymen qatar júıe turaqtylyǵy tek qarjylandyrý men ınfraqurylymǵa ǵana emes, aýrýdyń aldyn alý, erte anyqtaý jáne halyqpen ashyq ári tyǵyz baılanys ornatýǵa da tikeleı baılanysty ekeni aıtyldy. Osyndaı keshendi tásil densaýlyq saqtaý júıesine túsetin júktemeni azaıtyp qana qoımaı, azamattardyń medıtsınalyq uıymdarǵa degen senimin arttyrýǵa múmkindik beredi.
— Densaýlyq saqtaý salasy ózara tyǵyz baılanysta jumys isteıtin birtutas júıe bolýǵa tıis. Alǵashqy medıtsınalyq kómek, profılaktıka, aýrýlardy erte anyqtaý jáne kórsetiletin qyzmettiń sapasy bir júıe retinde jumys istegende ǵana nátıje bolady. Sondyqtan óńirdegi basshylardyń jaýapkershiligi men medıtsınalyq uıymdardyń jumysyna turaqty baqylaý erekshe mańyzdy, — dedi vıtse-premer.
Otyrysta áleýmettik saıasattaǵy ózekti máseleler de kóterildi. Bul salada halyqtyń senimi naqty erejeler men tıimdi basqarýǵa tikeleı baılanysty ekeni aıtyldy. Eńbek jáne halyqty áleýmettik qorǵaý vıtse-mınıstri Asqarbek Ertaev ataýly áleýmettik qoldaýǵa kóshý jáne óńirlik tólemderdi birizdendirý máselelerine toqtaldy. Ózgeristerdi engizý barysynda árbir azamatqa jeke túsindirý jumystaryn júrgizý jáne jergilikti deńgeıde barlyq úderisterdi durys jolǵa qoıý mańyzdy ekeni sóz boldy. Sebebi adamdar úshin qandaı ózgeris bolyp jatqanyn, onyń sebebi men ózderine qalaı áser etetinin naqty túsiný asa mańyzdy.
— Bilim berý salasy boıynsha mektepke deıingi uıymdardyń qoljetimdiligi, maman tapshylyǵy men erekshe bilim berý qajettilikteri bar balalardy qoldaý máselelerine basa nazar aýdaryldy. Oqý-aǵartý mınıstrliginiń málimetinshe, 2-6 jas aralyǵyndaǵy balalardyń 90,9%-y balabaqshamen qamtylǵanymen, áli de 25 myńnan astam balaǵa oryn qajet. Aıda Balaeva qazirgi bilim berý tek mektep pen balabaqsha sanyna ǵana emes, oqytý sapasyna, bilikti kadrlarǵa jáne balalarmen jumys isteýdegi zamanaýı tásilderge de baılanysty ekenin atap ótti, — delingen habarlamada.
Óńirdegi kadr daıarlaý men ǵylymdy damytý máselesi de nazardan tys qalmady. Ǵylym jáne joǵary bilim mınıstri Saıasat Nurbek eńbek naryǵyna qajetti mamandarǵa boljam jasaýǵa múmkindik beretin ulttyq saýalnama júrgizilip jatqanyn habarlady. Mundaı sharalar kadr saıasatyn naqty josparlaýǵa jáne joǵary oqý oryndary men kolledjderdegi bilim berý baǵdarlamalaryn tehnologııalyq ózgeristerge saı ýaqtyly beıimdeýge jol ashady. Bul rette bilim berý júıesi men eńbek naryǵy birtutas mehanızm retinde jumys isteýi tıis.
Sonymen qatar týrızm men buqaralyq sportty damytý máseleleri talqylandy. 2025 jylǵy 9 aı qorytyndysy boıynsha óńirde 370 myń týrıstke qyzmet kórsetilgen, jalpy tabys 8 mlrd teńgege jetken. Atalǵan salany odan ári damytý úshin ınfraqurylymdy jetildirý, týrıstik aımaqtardy ár maýsymǵa daıyndaý jáne demalys oryndaryndaǵy qoǵamdyq qaýipsizdikti kúsheıtý qajet ekeni aıtyldy.
Kezdesý sońynda Aıda Balaeva vedomstvoaralyq ózara baılanysty kúsheıtip, óńirlik deńgeıde áleýmettik qyzmetterdiń sapasyn arttyrýdy tapsyrdy. Basym baǵyttardyń qatarynda densaýlyq saqtaý salasynda profılaktıka sharalaryn kúsheıtý, áleýmettik qoldaý tetikterin naqtylaý, bilim berý júıesin tsıfrlandyrý, ekonomıkanyń suranysyna saı kadr daıarlaý, sondaı-aq mádenı orta men buqaralyq sportty damytý ómir sapasyn arttyrýdyń ajyramas bóligi retinde aıqyndaldy.
Buǵan deıin Aıda Balaevanyń tóraǵalyǵymen Almaty qalasynda áleýmettik salany damytý máseleleri boıynsha birqatar keńes ótkenin jazǵan edik.