Aıda Balaeva kámeletke tolmaǵandar isteri jónindegi óńirlik komıssııalardyń quramyn jańartýdy tapsyrdy
ASTANA. KAZINFORM – Úkimet kámeletke tolmaǵandar arasyndaǵy qaýip-qaterdiń aldyn alýǵa baǵyttalǵan jeke profılaktıkalyq jumysty kúsheıtip, óńirlik komıssııalardyń jumysyn jańǵyrtýda. Bul týraly Úkimettiń baspasóz qyzmeti habarlady.
Premer-mınıstrdiń orynbasary — mádenıet jáne aqparat mınıstri Aıda Balaevanyń tóraǵalyǵymen Úkimette kámeletke tolmaǵandardyń isteri jáne olardyń quqyqtaryn qorǵaý jónindegi komıssııalardyń qyzmeti, sondaı-aq balalar men jasóspirimder ortasynda quqyqbuzýshylyq pen býllıngtiń aldyn alý sharalary qaraldy.
Talqylaýǵa mınıstrlikter men múddeli memlekettik organdardyń ókilderi, sondaı-aq beınebaılanys arqyly qosylǵan óńir ákimdikteri qatysty.
Otyrys barysynda formaldy áreket etýden bas tartyp, aldyn ala jáne naqty baǵyttalǵan profılaktıkalyq jumysqa kóshý qajettigine erekshe nazar aýdaryldy. Birqatar óńirlerde basqarý tártibi men vedomstvoaralyq úılestirýdi túbegeıli kúsheıtýdi talap etetin jaǵdaılardyń saqtalyp otyrǵany atap ótildi. Mysal retinde qoǵamdyq qaýipsizdikke qatysty rezonansty oqıǵalar, sondaı-aq jergilikti deńgeıdegi jekelegen bıýdjettik sheshimderdiń tıimdiligine baılanysty máseleler aıtyldy.
Sonymen qatar balalardy qoldaý sharalaryn alǵash ret biryńǵaı keshendi formatta biriktirgen «Qazaqstan balalary» baǵdarlamasynyń iske asyrylý barysy da talqylandy.
— Biz sanǵa emes, sapaǵa jumys isteýimiz kerek — ár bala boıynsha naqty nátıjege qol jetkizý mańyzdy. Komıssııa formaldy organ bolyp qalmaýy tıis. Árbir jaǵdaı jeke qaralyp, tıisti súıemeldeý belgilenip, qabyldanǵan sharalardyń is júzindegi nátıjesi mindetti túrde tekserilýi qajet. Biz úshin bala bolashaǵy bárinen mańyzdy, — dep atap ótti Aıda Balaeva.
Jıyn qorytyndysy boıynsha Premer-mınıstrdiń orynbasary birqatar naqty tapsyrma berdi.
Atap aıtqanda, bir apta ishinde óńirlik komıssııalardyń quramyn jańartyp, olardy sarapshylar qaýymdastyǵy, ata-analar uıymdary, úkimettik emes uıymdar men qoǵamdyq keńester ókilderi esebinen keńeıtý, sondaı-aq «Qazaqstan balalary» baǵdarlamasyn iske asyrý aıasynda óńirlerge respýblıkalyq qujat negizinde, jergilikti erekshelikterdi eskere otyryp, óz josparlaryn bekitý tapsyryldy.
Aıta ketelik Erlan Qarın «Qazaqstan balalary» baǵdarlamasy BUU-nyń Turaqty damý maqsatyna sáıkes keletinin aıtqan edi. Sondaı-aq «Qazaqstan balalary» tujyrymdamasy 1,3 trln teńge kóleminde qarjylandyrylady.