Aıda Balaeva halyqaralyq mýzykalyq baıqaýlardyń júldegerlerin quttyqtady
ASTANA. KAZINFORM – QR Premer-mınıstriniń orynbasary – Mádenıet jáne aqparat mınıstri Aıda Balaeva halyqaralyq mýzykalyq baıqaýlarda júldeli oryndarǵa ıe bolǵan qazaqstandyq jas ónerpazdarmen kezdesti.
Kezdesýge Aqerke Amalıat, Jasmına Túzelova, Alen Básen, sondaı-aq olardyń ustazdary men ata-analary qatysty. Júldegerlerdi jeńisimen quttyqtaǵan Aıda Balaeva Memleket basshysy eldiń ornyqty damýynyń basty alǵysharty sanalatyn adamı kapıtaldy damytýǵa aıryqsha mán beretinin atap ótti. Prezıdent óskeleń urpaqty tárbıeleýde, ulttyq biregeılikti nyǵaıtýda mádenıet pen ónerdiń orny erekshe ekenin únemi aıtyp keledi.
Jańa Konstıtýtsııada mádenıet pen ulttyq qundylyqtar memleketti damytýdyń mańyzdy negizderiniń biri retinde bekitilgen. Sondyqtan daryndy balalar men jastardy qoldaý – el bolashaǵyna salynǵan strategııalyq ınvestıtsııa.
– Búgin sizdermen birge búkil Qazaqstan qýanyp otyr. Osyndaı árbir jeńis – elimizdiń ortaq jetistigi. Bul bıik nátıjelerdiń artynda jas ónerpazdardyń talanty men tabandylyǵy, ustazdardyń kásibı sheberligi jáne ata-analardyń qoldaýy tur. Qazaqstandyq balalardyń halyqaralyq sahnada óz ónerin senimdi tanytyp, joǵary nátıjelerge qol jetkizýi otandyq óner mektebiniń deńgeıi bıik ekenin kórsetedi. Sizderge jańa jeńister men shyǵarmashylyq tabys tileımin, – dedi Premer-mınıstrdiń orynbasary.
Aqerke Amalıat 2026 jyly ótken «Vıtebskidegi slavıan bazary» XXXV halyqaralyq óner festıvaliniń estradalyq án oryndaýshylar baıqaýynda І oryndy ıelenip, «Lıra» arnaıy syılyǵyna ıe boldy.
Jasmına Túzelova atalǵan festıval aıasyndaǵy balalar baıqaýynda ІІ oryndy jeńip aldy. Sonymen qatar oǵan avtorlyq án jazýǵa múmkindik beretin arnaıy sertıfıkat tabystaldy.
Jas vıolonchelshi Alen Básen Italııada ótken Rovere d’Oro XXXVII halyqaralyq mýzyka baıqaýynyń jeńimpazy atandy. Ol «Jas talanttar» sektsııasynyń ekinshi jas sanatynda múmkin bolǵan 100 upaıdyń 100-in jınap, Primo Premio Assoluto marapatyna ıe boldy.
Kezdesý barysynda jas oryndaýshylardyń kásibı qalyptasýyna eleýli úles qosqan ustazdar men ata-analardyń eńbegi de erekshe atalyp ótti. Baıqaý jeńimpazdary, olardyń ata-analary men ustazdary halyqaralyq óner dodalarynan alǵan áserlerin jetkizdi.
Sondaı-aq daryndy balalarǵa kórsetilip jatqan qoldaý úshin shynaıy rızashylyqtaryn bildirdi. Qatysýshylar mádenıet pen ónerdi damytýǵa kórsetiletin qoldaý jáne jańa múmkindikter jetistikterge jeteleıtinin aıtty.
