Aıda Balaeva Halyqaralyq balalardy qorǵaý kúni qarsańynda úndeý jarııalady
ASTANA. KAZINFORM – QR Mádenıet jáne aqparat mınıstri Aıda Balaeva «Qazaqstan balalary» ulttyq naýqany bastalǵany týraly úndeý jarııalady, dep habarlaıdy mınıstrliktiń baspasóz qyzmeti.
- Qurmetti dostar!
Barshańyzdy aldaǵy Halyqaralyq balalardy qorǵaý kúnimen shyn júrekten quttyqtaımyn!
Mereke qarsańynda Memleket basshysynyń tapsyrmasyna sáıkes «Otbasy – tárbıe bastaýy!» uranymen onkúndik bastaldy. Óıtkeni bala tárbıesinde sheshýshi ról atqaratyn – otbasy. Dál osy ortada tulǵanyń qabileti damyp, bolmysy qalyptasady.
Prezıdentimiz balalardyń sapaly bilim alýy men tárbıesine memleket pen ata-ananyń ortaq jaýapkershiligi mańyzdy ekenin únemi aıtyp keledi. Sotsıologııalyq zertteýlerge sáıkes, azamattardyń 90%-y ata-ana bolýdy ómirindegi eń mańyzdy qundylyq dep sanaıdy. Al 85 paıyzy ata-ana men bala arasyndaǵy ózara túsinistikti – otbasylyq ál-aýqattyń negizgi sharty retinde kóredi, - dedi mınıstr.
Sondaı-aq ol memleket ár bala tek úıde ǵana emes, qoǵamda da qamqorlyq pen súıispenshilikke bólenýi úshin barlyq jaǵdaıdy jasap keletinin atap ótti.
Bul baǵytta Áıelder isteri jáne otbasylyq-demografııalyq saıasat jónindegi ulttyq komıssııa men Mádenıet jáne aqparat mınıstrligine mańyzdy mindetter júktelgen.
Ulttyq komıssııanyń «One-Stop-Service» jobasy aıasynda balalarǵa qatysty seksýaldyq zorlyq-zombylyq oqıǵalaryn qamtıtyn 50-ge jýyq qylmystyq is qaralyp, 700-den astam áıel men balaǵa jedel kómek kórsetildi.
Shalǵaı óńirlerge qyzmet kórsetken «Salamatty Qazaqstan» poıyzy 100 myńnan astam azamatty qamtydy. Ásirese kópbalaly analar men múmkindigi shekteýli balalardy tárbıelep otyrǵan áleýmettik osal otbasylarǵa erekshe nazar aýdaryldy. Sondaı-aq, balalardyń tsıfrlyq qaýipsizdigi men sýıtsıdtiń aldyn alý boıynsha naqty bastamalar júzege asýda.
Memleket basshysy tóraǵalyq etken Úshinshi Ulttyq Quryltaıda berilgen tapsyrmaǵa sáıkes, Úkimet «Qazaqstan balalary» biryńǵaı baǵdarlamasyn ázirlep jatyr. Bul baǵdarlama elimizdegi balalardyń ózekti máselelerin sheshýge arnalǵan, zamanaýı syn-qaterlerge jaýap beretin tutas ulttyq júıe bolmaq.
Bıyl Mádenıet jáne aqparat mınıstrligi bala tárbıeleýge baǵyttalǵan otandyq jáne úzdik halyqaralyq tájirıbelerge negizdelgen «Ata-ana akademııasy» jobasyn iske qosty. Jaqyn arada arnaıy onlaın platforma iske qosylady.
- Áıelder isteri jáne otbasylyq-demografııalyq saıasat jónindegi ulttyq komıssııa atynan barsha ata-analardy balalarynyń qyzyǵýshylyqtary men muqtajdyqtaryna kóbirek kóńil bólýge shaqyramyn. Baqytty ári deni saý urpaq – elimizdiń basty maqtanyshy jáne memleketimizdiń órkendeýiniń shynaıy kórsetkishi. Merekede barlyq otbasyǵa baqyt pen bereke, januıa jylýyn tileımin, -dedi mınıstr.
Osyǵan deıin Aıda Balaeva Qazaqstan mýzeıleriniń qorynda 4,5 mıllıonnan astam qundy jádiger bar ekeni týraly aıtqan edi.