Aıda Balaeva: Ekpe jasaýdyń ózektiligi onyń sapasyn zańnamalyq deńgeıde bekitý turǵysynan mańyzdy bolyp tur
«Eń aldymen, osy otyrǵan barshańyzdy esen-aman kórgenime qýanyshtymyn. Bizdiń búgingi áńgimemiz de osy densaýlyqtyń ózekti máselesine tikeleı qatysty bolǵandyqtan, ony kezekti pikirtalas alańyna shyǵaryp otyrmyz. Ózderińizge málim, bizdiń mınıstrligimiz qoǵamdaǵy eń ózekti, eldiń eń qarama-qaıshy pikirleri toǵysqan máselelerdi ortaǵa salyp, osyndaı oı-talas alańynda talqylap, durys tujyrymdar jınaqtaýdy dástúrge aınaldyrdy. Búgingi taqyrybymyz - eldi jappaı vaktsınatsııalaý máselesi. Onyń mán-mazmunyn bilikti maman, sarabdal sarapshy retinde sizderden artyq eshkim bilmeıdi», - dedi Qazaqstandaǵy mindetti ekpe máselesin talqylaýǵa arnalǵan onlaın konferentsııany ashqan Aıda Balaeva.
Osy oraıda mınıstr «Halyq densaýlyǵy jáne densaýlyq saqtaý júıesi týraly» kodeks jobasynyń aldyn alý ekpelerin salýǵa qatysty keıbir tarmaqtary qoǵamnyń qyzý talqysyna túsip, ózekti problemaǵa aınalǵandyǵyn basa aıtty.
«Biz bul taqyrypty tek qana ózekti bolǵany úshin ǵana emes, sonymen birge árbir azamatqa atalǵan sharalardyń zańnamalyq deńgeıde bekitý qajettigin túsindirý jáne jetkizý turǵysynda barynsha mańyzdylyǵyna oraı tańdap alǵanymyzdy atap ótken oryndy. Vaktsınatsııa mańyzdylyǵyn, ásirese, qazirgi búkil álem koronavırýs indetimen kúresip jatqan kezde qaıta baǵalaý barynsha kúrdeli ekendigi sózsiz. Buǵan qosa, vaktsına ázirleýdiń oń nátıjelerin taǵytsyzdana kútip otyrmyz», - dedi ol.
Onyń atap ótýinshe, vaktsınatsııaǵa qarsy ıdeıalar men pikirler de bar. Olardy de elemeı ketýge bolmaıdy.
«Óıtkeni, kópshiligi vaktsınatsııanyń ózine emes, onyń sapasyna qarsy. Dál osy oraıda jańa kodeks atalǵan erekshelikterdiń bárin eskerip, jaýapkershiliktiń, onyń ishinde sapasyz vaktsınatsııa úshin de naqty tetikterin engizedi. Ózderińiz kórip otyrǵandaı, bul máselede barynsha syndarly saıasat qajet. Onyń sátti júzege asyrylýyna siz ben bizdiń densaýlyǵymyz ǵana emes, sonymen birge balalarymyz ben nemerelerimizdiń de aman-esendigi baılanysty. Shyndap kelgende bolashaq densaýlyq kepili de. Sondyqtan da biz úshin túrli pikirlerdi jáne eń aldymen oǵan qatysty sarapshylardyń pikirlerin estý mańyzdy. Búgingi bizdiń kezdesýimiz qoǵamdaǵy zań jobasyna qatysty barlyq negizgi máselelerge laıyqty jaýap tabatyndyǵyna senimdimin», - dedi Aıda Balaeva.
