Aıda Balaeva Djekı Chandy Qazaqstandaǵy túsirilimniń bastalýymen quttyqtady
ASTANA.KAZINFORM - Búgin Almaty qalasynda belgili akter Djekı Channyń qatysýymen túsiriletin Armour of God: Ultimatum («Dospehı boga: Ýltımatým») halyqaralyq kórkem fılminiń óndirisin resmı túrde bastaý rásimi ótti. Bul týraly Mádenıet jáne aqparat mınıstrligi habarlady.
Saltanatty is-sharaǵa QR Premer-Mınıstriniń orynbasary – Mádenıet jáne aqparat mınıstri Aıda Balaeva, Almaty qalasynyń ákimi Darhan Satybaldy, Almaty oblysynyń ákimi Marat Sultanǵazıev, sondaı-aq qazaqstandyq jáne halyqaralyq kınoındýstrııa ókilderi qatysty. Úkimet basshysynyń orynbasary Djekı Channyń Qazaqstan men Qytaı arasyndaǵy mádenı-gýmanıtarlyq baılanystardy damytýǵa qosyp otyrǵan úlesin joǵary baǵalady.
– Qazaqstan mádenıetin álemdik arenada tanytýǵa jáne eki el arasyndaǵy mádenı-gýmanıtarlyq baılanysty nyǵaıtýǵa qosyp otyrǵan úlesińiz úshin Sizge alǵys bildiremin. Aldaǵy túsirilim jumystaryna sáttilik, jańa shyǵarmashylyq tabystar tileımin, – dedi Aıda Balaeva.
Kezdesý barysynda Djekı Chan Almatynyń talantty jas sýretshilerimen jáne T.Júrgenov atyndaǵy Qazaq ulttyq óner akademııasynyń túlekteri – jas kınematografıstermen áńgimelesti. Ol jastarǵa shyǵarmashylyq jolda tabys tilep, úzdiksiz izdenis pen óz isine degen súıispenshiliktiń mańyzyn atap ótti. Kezdesý sońynda balalar áıgili akterge ózderi salǵan portretterdi tartý etti.
Іs-shara sońynda qatysýshylar dástúrli túsirilim taqtaıshasymen estelik sýretke tústi. Osylaısha fılm óndirisiniń resmı bastalǵany aıshyqtaldy. Joba QR Mádenıet jáne aqparat mınıstrliginiń jáne Qytaıdyń memlekettik kınokompanııasy China Film Group Corporation-nyń qoldaýymen júzege asyrylyp jatyr.
Fılm óndirisimen qazaqstandyq Sálem Entertainment kompanııasy jáne gonkongtyq Billion Target kompanııasy aınalysady. Fılm túsirilimi 2026 jylǵy shilde men qazan aılary aralyǵynda Qazaqstan aýmaǵynda ótedi.
Kartınanyń qoıýshy rejısseri – qazaqstandyq Robert Kýn.
Týyndy keń halyqaralyq prokatqa baǵyttalǵan. Negizgi túsirilim alańdary Almaty qalasynda, Almaty jáne Mańǵystaý oblystarynda ornalasady. Bul joba Qazaqstan úshin strategııalyq ári ımıdjdik turǵydan mańyzdy. Onyń júzege asyrylýy elimizdiń mádenı, týrıstik jáne ınvestıtsııalyq áleýetin ilgeriletýge, kınotýrızmdi damytýǵa, halyqaralyq yntymaqtastyqty nyǵaıtýǵa jáne Qazaqstandy álemdik deńgeıdegi iri kınojobalardy túsirýge qolaıly zamanaýı alań retinde keńinen tanytýǵa yqpal etedi.
Mańǵystaý oblysynda álemge áıgili akter Djekı Channyń qatysýymen túsiriletin «Dospehı Boga 4: Ýltımatým» halyqaralyq kıno jobasynyń túsirilimi bastalǵanyn jazǵan edik.
Gennadıı Golovkın Djekı Chanǵa shapan japty.
