Aıda Balaeva: Densaýlyq - erteńgi ómirlik jetistikterińizdiń kepili
«Shynymen de qazir óte qıyn kezeń. Sondyqtan bul rette bireýge baǵa berý de óte qıyn. Dese de 2-3 kún buryn BAQ qyzmetkerleri kúnin atap ótken kezde jalpy bárimiz jýrnalısterdiń osy salada atqarǵan rólin atap óttik. Rasynda qazir dárigerlermen, polıtsııa qyzmetkerlerimen qatar shynaıy ári qoljetimdi aqparattardyń barlyǵy tek BAQ arqasynda halyqqa jetkizilip otyr. Bólip jarmaımyn, jekemenshik bolsyn, memlekettik bolsyn – halyq BAQ arqyly shynaıy aqparatty bilýde. Jýrnalısterdiń eńbegi orasan zor», - dedi Aıda Balaeva OKQ-da ótken baspasóz máslıhatynda.
Mınıstr keıbir jýrnalıster jumys barysynda koronavırýs aýrýyn juqtyryp alǵanyn da ókinishpen atap ótti.
«Óz basym áriptesterime tezirek saýyǵyp, ujymdaryna qaıta oralýyna tilektespin. Jalpy bul turǵyda aıta keterligi, aýrý aıtyp kelmeıdi. Іndet te elge tosynnan kelip otyr. Saldaryn dúnıe júzi kórýde. Bir aqıqatty túsinýimiz kerek: mundaı aýqymdy indetpen jappaı kúresýge birde-bir memlekettiń qaýqary jetpeıtin sekildi. Syndar da aıtylýda. Dese de Memleket basshysy bul máseleni jiti nazarynda ustap otyr. Naqty sharalar qabyldanýda. Іndet bolsyn, basqa aýrý bolsyn – ár adam óz densaýlyǵyna jaýapty. Sondyqtan bul rette indettiń taramaýyna ár adam óz úlesin qosa alamyz. Ol úshin dárigerler aıtyp otyrǵan bes qaǵıdany saqtasaq – óz densaýlyǵymyzdyń jaqsy bolýyna jaýapkershilikti ár adam sezse, meniń oıymsha, bul indetten de shyǵamyz. Ár adamnyń densaýlyǵy – ol adamnyń básekege qabilettiligi. Sondyqtan óz bolashaǵymyzǵa jaýapkershiligimiz zor bolsyn desek, qazirgi tańda dárigerlerdiń aıtyp jatqan keńesine kóńil qoıyp, sony saqtaıyq. Densaýlyq - erteńgi ómirlik jetistikterińizdiń kepili», - dedi Aıda Balaeva.
