Aıda Balaeva: Bıýdjettik aqparattarǵa qoǵamnyń qoljetimdiligin arttyrý qajet

NUR-SULTAN. QazAqparat - Bıýdjettik aqparattarǵa qoǵamnyń qoljetimdiligin arttyrý qajet. Bul týraly QR Aqparat jáne qoǵamdyq damý mınıstri Aıda Balaeva aıtty, dep habarlaıdy QazAqparat tilshisi.

«Tolyqtaı alǵanda, 2019 jylǵa arnalǵan bıýdjet ashyqtyǵy jónindegi halyqaralyq sholý saraptamasyn qaraıtyn bolsaq, onda bul málimetter qoǵamnyń bıýdjettik aqparatqa qoljetimdiligin arttyrý qajettigine dálel bola alady. 100 ball dep alsaq, búginde Qazaqstan 58 ball jınap otyr», - dedi mınıstr Aqparatqa qol jetkizý máseleleri jónindegi komıssııanyń otyrysynda.

Onyń atap ótýinshe, bıýdjet qalyptastyrýǵa qoǵamnyń qatysý úlesi de tómen deńgeıde qalyp otyr.

«Qoǵamnyń bıýdjetti qalyptastyrýǵa qatysýyn alyp qaraıtyn bolsaq, 100 baldan nebári 17 ball ǵana alady. Sondyqtan bul jumysty jetildirý qajet», - dedi Aıda Balaeva.

Aıta keteıik, onlaın formatta ótken Aqparatqa qol jetkizý máseleleri jónindegi komıssııanyń otyrysynda múmkindigi shekteýli adamdardyń aqparatqa qol jetkizý máseleleri, memlekettik organdardyń ashyqtyq deńgeıin jyl saıynǵy baǵalaýdyń negizgi qorytyndylary, memlekettik organdardyń ınternet-resýrstarynyń biryńǵaı tuǵyrnamasynyń jumysy, sondaı-aq «Ashyq bıýdjetter» portalyn jetildirý boıynsha jumys josparynyń oryndalýy talqylandy.