Aıda Balaeva: Bizdiń maqsat – otbasylyq qundylyqtyń zamanǵa saı úlgisin jasaý
«Biz úsh baǵyt boıynsha jumys toptaryn qurdyq. Jumys toptary otbasy ınstıtýtyn nyǵaıtý, balalardy qoldaý men genderlik teńdikti ilgeriletý baǵytynda naqty ustanymdardy ázirleıtin bolady. Mınıstrliktiń janynda otbasy ınstıtýtyn zertteý ortalyǵy jumys isteıdi. Ortalyqtyń basty maqsaty – otbasy jáne kópbalaly otbasylardy qoldaý, demokratııalyq saıasat máseleleri boıynsha naqty zertteýlerdi júrgizý. «Rýhanı jańǵyrý» baǵdarlamasy aıasynda da birqatar sharýa júzege asyrylyp otyr. Solardyń ishinde ásirese, dástúr men ǵuryp, ulttyq tárbıe baǵytyndaǵy jobalardy erekshe atap aıtqym keledi», - dedi Aıda Balaeva «Otbasy kúni» aıasynda ulttyq tárbıe berý men otbasy qundylyqtaryn damytý máseleleri talqylanǵan sharada.
Mınıstrdiń aıtýynsha, bulardyń barlyǵy otbasylyq tárbıe, jalpyhalyqtyq rýhanı qundylyqtardy, ulttyq salt-dástúrdi nasıhattap, ultaralyq qarym-qatynas pen toleranttyqty nyǵaıtýǵa baǵyttalǵan.
«Prezıdent Qazaqstan halqyna Joldaýynda «Jaýapty memleket, jaýapty qoǵam, jaýapty adam» júıesin ornatý týraly aıtty. Bul mindettiń túbinde qoǵamdyq tárbıe uǵymy jatyr. Al tárbıeniń bastaý bulaǵy, qaınar kózi – otbasynda. Sondyqtan otbasylyq qundylyqtyń jańa zamanǵa saı úlgisin jasaý – bizdiń búgingi basty maqsatymyz. Bul oraıda qoǵamdyq talqylaýdyń, halyq pikiriniń mańyzy qashan da zor», - degen mınıstr «dóńgelek ústelge« qatysýshylardan naqty usynystardy kútetinin jetkizdi.
