Aıda Balaeva: Biz bilikti kadrlardy daıarlaýdyń naqty júıesin jasaımyz

NUR-SULTAN. QazAqparat - Aqparat jáne qoǵamdyq damý mınıstri Aıda Balaeva otandyq BAQ salasyn damytý máselelerine arnalǵan dóńgelek ústel jıynynda Ulttyq jospar aıasynda otandyq aqparat keńistigin damytýdyń bir baǵyty retinde adamı kapıtaldy damytýdy atady.

– Eń aldymen bul kadrlardy daıarlaý júıesine qatysty másele. Bul jerde áńgime kadr sapasyna baǵa berýde emes, jańa da jasampaz jol izdep, deńgeıin kóterýde. Jasyratyny joq, dál qazirgi kezde bizde ekonomıka, medıtsına, qarjy júıesi jáne taǵy da basqa kúrdeli taqyryptardy alyp júretin bilikti jýrnalıster joq. Redaktsııalar mundaı mindetti jalpy tájirıbesi bar mamandarǵa júkteýge májbúr. Nátıjesinde, sapasyz kontent, qate aqparat tarap jatady. Sondyqtan da bul máselelerdi sheshýde Ulttyq jospar aıasynda qurylatyn mýltımedııalyq bilim berý tuǵyrnamasy úlken rol atqaratyn bolady, – dedi Aıda Balaeva.

Mınıstr osynyń ishinde jas mamandarǵa arnalǵan granttyq baǵdarlamalardy erekshe atap ótti. Ony ázirleýge jáne iske asyrýǵa jýrnalıstıka jáne bilim berý salasyndaǵy jetekshi sarapshylar tartylmaq.