Aıda Balaeva bir aptada 100-den astam azamatty qabyldaǵan
NUR-SULTAN. QazAqparat – Aıda Balaeva QR Prezıdentiniń kómekshisi laýazymyndaǵy jumysynyń alǵashqy áserlerimen bólisti, dep habarlaıdy QazAqparat.
«Mine, jańa laýazymdaǵy jumysymnyń úsh aptasy ótti. Osy ýaqyt ishinde bólimniń jumysyn uıymdastyrý boıynsha eń mańyzdy qadamdar jasaldy. Bir apta ishinde 100-den astam azamatty jeke qabyldadym. Munyń úlken emotsııalyq júgi bar», - dep jazdy Aıda Balaeva Facebook-tegi paraqshasynda.
Onyń aıtýynsha, halyqty tolǵandyratyn negizgi máseleler – turǵyn úı, bank nesıeleri, sot sheshimderi men quqyq qorǵaý organdarynyń áreketteri.
«Kóptegen adamdar quqyqtyq saýattylyqtyń tómen bolýyna baılanysty qıyn jaǵdaıǵa tap bolyp, joǵary turǵan memlekettik organdarǵa úmit artady. Bul jerde kóterilgen máselelerdiń bárin qysqa merzimde sheshýge bolmaıtynyn túsiný mańyzdy. Búginde Nur-Sultan qalasynyń ákimdiginde turǵyn úı kezeginde 48 myńǵa jýyq adam turady. Kóbi uzaq jyldar boıy kezekte tur. Sondyqtan, adam Prezıdent Ákimshiligine júgingendikten ǵana turǵyn úı berý múmkin emes», - dep atap ótti Memleket basshysynyń kómekshisi.
Ol óz jazbasynda baspana máselesi turǵyn úı kezegi negizinde sheshilý kerek degen pikirin aıtty.
«Turǵyndarǵa Prezıdent Ákimshiliginiń sot sheshimine áser etýge quqyǵy joq ekenin túsindirý mańyzdy. Sot shaǵymdaryn tek Joǵarǵy sot nemese Bas prokýratýra ǵana qaraı alady. Bizdiń mindetimiz-sapaly quqyqtyq kómek kórsetý, problemalardy sheshýdiń qolaıly joldary men algorıtmderin tabý. Osy aptada men Almatydan kelgen problemalyq ıpotekalyq toppen kezdestim. Joǵarǵy Sottyń, Bas prokýratýranyń, Ulttyq banktiń jáne joǵary bilikti zańgerlerdiń qatysýymen arnaıy jumys toby quryldy. Osylaısha ári qaraı jumys isteımiz»- dep jazǵan A. Balaeva jaqyn arada azamattardy jeke qabyldaý úshin óńirlerdi aralaıtynyn málimdedi.
«Osyǵan baılanysty, bizdiń azamattyq qoǵamymyzǵa jáne úkimettik emes uıymdarǵa halyqtyń quqyqtyq saýattylyǵyn, medıatsııa ınstıtýttaryn damytýǵa belsendi túrde járdemdesýge shaqyramyn. Birlesken kúsh - jigerimizben ǵana azamattar úshin de, jergilikti atqarýshy organdar úshin de aıtarlyqtaı nátıjelerge qol jetkizetinimizge senimdimin. Biz birlesip júıeli problemalardy anyqtaýǵa jáne olardy sheshýdiń ońtaıly joldaryn tabýǵa kómektesýimiz kerek» - dep túıindedi Aıda Balaeva.
Eske salsaq, Memleket basshysynyń Jarlyǵymen Aıda Balaeva QR Prezıdentiniń kómekshisi – Qazaqstan Respýblıkasy Prezıdenti Ákimshiliginiń Ótinishterdi qaraýdy baqylaý bóliminiń meńgerýshisi bolyp taǵaıyndalǵan bolatyn.
