Aıda Balaeva: Beıbit jınalystar týraly zań jobasy qoǵam talabyna saı keledi

NUR-SULTAN. QazAqparat – Aqparat jáne qoǵamdyq damý mınıstri Aıda Balaeva «QR-da beıbit jınalystardy uıymdastyrý jáne ótkizý tártibi týraly» zań jobasynyń ázirlenýine belsendi atsalysqan depýtattar men azamattyq qoǵam ókilderine alǵysyn bildirdi, dep habarlaıdy QazAqparat tilshisi.

«Parlament Májilisiniń depýtattary maquldaǵan «QR-da beıbit jınalystardy uıymdastyrý jáne ótkizý tártibi týraly» zań jobasy – Prezıdenttiń saıası reformalary paketindegi basty bastamalardyń biri. Beıbit jınalystardy ótkizý erkindigi bizdiń eldiń Konstıtýtsııasymen bekitilgen. Bul quqyq – demokratııalyq qoǵamnyń negizgi elementteriniń biri. Zań jobasy ártúrli qoǵamdyq alańda talqylanyp, jumys tobynyń otyrysy kóp jerde ótti. Parlamentte ÚEU ókilderiniń, ǵalymdar men sarapshylardyń qatysýymen ashyq túrde jáne keńinen talqylandy», - dedi Aıda Balaeva zań jobasyna qatysty bildirgen pikirinde.

Mınıstr zań jobasynyń ashyq talqylaýdyń arqasynda Parlament Májilisi men Senaty qabyrǵasynda zań jobasy edáýir kontseptýaldyq ózgeristerge ushyraǵanyn aıtyp ótti.

«Maquldanǵan jobalar halyqaralyq úzdik tájirıbelermen birge, bizdiń qoǵamnyń talaby men suranysyna saı keledi. Zań jobasynyń ázirlenýine belsendi atsalysqan depýtattar men azamattyq qoǵam ókilderine, Ulttyq qoǵamdyq senim keńesine alǵysymdy bildiremin», - dedi mınıstr.

Eske sala ketsek, Májilis depýtattary búgin «QR-da beıbit jınalystardy uıymdastyrý jáne ótkizý tártibi týraly» zań jobasyna Parlament Senaty engizgen ózgerister men tolyqtyrýlardy qoldap, daýys bergen bolatyn.