Aıda Balaeva: Basty qundylyǵymyz - azamattardyń amandyǵy
Azamattyq forým barysynda «Men senemin» taqyrybynda sessııa jumysy ótti. Oǵan belgili telejúrgizýshi Dana Nurjigit moderatorlyq jasap, azamattyq sektordyń bolashaǵy jaıly áńgimege QR Prezıdenti Ákimshiligi Іshki saıasat bóliminiń meńgerýshisi Aıda Balaevany tartty.
«Qazirgi tańda álemdik saıasatta, qoǵamdyq bastamalarda áıelderdiń belsendiligi týraly kóp aıtylady. Bul rette, bizdiń eldegi jaǵdaı qandaı dep oılaısyz?», - dep suraq qoıdy Dana Nurjigit.
Bul saýalǵa jaýap bergen Aıda Balaeva jalpy, áıelder - memlekettiń tiregi ári qoldaýy ekenin atap ótti. 
«Bul týraly árdaıym Memleket basshysy da aıtyp keledi. Elbasy óz sózinde «isti áıelderge tapsyrǵan durys, sebebi olardyń jaýapkershiligi mol» dep aıtyp otyrady. Sondyqtan, áıelderdiń jaýapkershiligi men eńbekqorlyǵy mol ekenin aıta ketý kerek. Áıel degen, eń aldymen - ana. Sol sebepti, barlyq aýqymdy tárbıelik mıssııa áıelderge júktelgen. Bizdiń muǵalimder men tárbıeshiler, analarymyz shynynda da, balalarymyzdyń ishki dúnıesin qalyptastyryp, sol arqyly qoǵamnyń irgesin qalaıdy. Búgingi tańda barlyq áıelderge qandaı jumyspen aınalysýdy jón dep tapsa da, barlyq jaǵdaı jasalǵan. Er bolsyn, áıel bolsyn elimizdegi jaýapkershiligi mol kez kelgen azamat óz maqsatyna jete alady. Memlekettik qyzmette de, jýrnalıstıkada da, úkimettik emes uıymdarda da, barlyq salada... Sondyqtan, áıelder, álbette - bizdiń memlekettiń tiregi», - dedi Aıda Balaeva. 
Sonymen qatar Dana Nurjigit azamattyq sektordy kútip turǵan ózgeristerge qatysty Aıda Balaevanyń pikirin surady.
«Meniń oıymsha, ózgerister kúni erteń bastalyp ketýi kerek. Tipti búgin de... Sebebi, meniń esepteýimshe, osy forýmdaǵy bizdiń kezdesý kóptegen mańyzdy ári áleýmettik máselelerdi sheshýge baǵyttalǵan naqty sharalardy ázirleýge múmkindik beredi. Tıisinshe, bul sharalar óte tıimdi bolýy kerek. Óıtkeni, bári de bir-birin ózara aqparattandyryp is atqarsa - maqsat oryndalady. Bizdiń osylaı jınalyp, máselelerdi talqylaýymyzdyń mańyzy zor. Basty qundylyǵymyz - azamattardyń amandyǵy men turaqtylyǵy. Árbir kezdesýimiz - birlesken jumystarymyzdy jetildire túsip, dıalogymyz konstrýktıvti bola túser degen senimdemin», - dedi Aıda Balaeva.
Buǵan deıin habarlaǵanymyzdaı, Astanada VІІІ Azamattyq forým ótip jatyr. Elbasynyń qatysýy kútiletin aýqymdy shara eki kúnge sozylady.
