Aıda Balaeva: balalardyń jazǵy demalysy qaýipsiz bolýy tıis
ASTANA. KAZINFORM – Búgin Úkimette QR Premer-mınıstriniń orynbasary – mádenıet jáne aqparat mınıstri Aıda Balaevanyń tóraǵalyǵymen balalardyń jazǵy demalysyn uıymdastyrý jónindegi respýblıkalyq shtabtyń otyrysy ótti. Bul týraly Úkimettiń baspasóz qyzmeti habarlady.
Jıynǵa Oqý-aǵartý mınıstri Juldyz Súleımenova, Densaýlyq saqtaý mınıstri Aqmaral Álnazarova, Іshki ister mınıstriniń orynbasary Igor Lepeha, sondaı-aq oblys ákimderiniń orynbasarlary qatysty.
Premer-mınıstrdiń orynbasary jazǵy naýqanǵa daıyndyq barysy, balalardyń qaýipsizdigin qamtamasyz etý, sanıtarııalyq-epıdemıologııalyq talaptardyń saqtalýy, medıtsınalyq kómek jáne kanıkýl kezeńinde oqýshylardyń bos ýaqytyn tıimdi uıymdastyrý máseleleri boıynsha qatysýshylardyń aqparatyn tyńdady.
Aıda Balaeva balalardyń jazǵy demalysyn sapaly uıymdastyrý basym mindetterdiń biri ekenin atap ótip, bul baǵyt barlyq múddeli memlekettik organdar men óńir ákimdikteriniń úılesimdi jumysyn talap etetinin aıtty.
Oqý-aǵartý mınıstrliginiń aqparatyna sáıkes, bıyl demalys is-sharalarymen 3,2 mln balany qamtý josparlanyp otyr. Bul – eldegi oqýshylardyń jalpy sanynyń 86,2%-y. Jazǵy kezeńde balalardyń demalysy jyl boıy jumys isteıtin 20 ortalyqta, 179 maýsymdyq ortalyqta, sondaı-aq mektepter men mektepten tys uıymdar janyndaǵy 10 894 ortalyqta uıymdastyrylady. Sonymen qatar Oqý-aǵartý mınıstrligi bilim berý-saýyqtyrý ortalyqtaryn lıtsenzııalaý tártibin jańartty. Lıtsenzııalar menshik nysanyna qaramastan, uıymdarǵa «Elektrondyq úkimet» portaly arqyly 5 jyl merzimge beriletin bolady. Osy jyldyń 1 mamyryna deıin barlyq qajetti normatıvtik quqyqtyq aktilerdi qabyldaýdy aıaqtaý josparlanyp otyr.
Balalardyń jazǵy kezeńdegi mazmundy ári paıdaly bos ýaqytyn uıymdastyrý máselesine erekshe nazar aýdaryldy. Oqýshylardyń 97%-yn paıdaly qyzmet túrlerimen qamtý kózdelip otyr. Osy maqsatta shyǵarmashylyq, sporttyq, týrıstik, zııatkerlik jáne eńbek baǵyttary boıynsha baǵdarlamalar júzege asyrylady. Densaýlyq saqtaý mınıstrliginiń dereginshe, 2026 jylǵy jazǵy saýyqtyrý maýsymyna daıyndyq aıasynda balalar demalysynyń sanıtarııalyq-epıdemıologııalyq qaýipsizdigin qamtamasyz etý boıynsha júıeli jumys júrgizilýde. Qazirgi ýaqytta sanıtarııalyq-epıdemıologııalyq qorytyndylar berý jumystary qolǵa alynǵan. Lagerler jumysyna ruqsat berýdegi negizgi faktor olardyń daıyndyq sapasy bolatyny atap ótildi.
Sonymen qatar vedomstvo alǵash ret lagerlerdegi medıtsınalyq qyzmetti lıtsenzııalaý, sondaı-aq jazǵy saýyqtyrý lagerleriniń dárigerleri men meıirgerlerine arnalǵan balalardy medıtsınalyq qamtamasyz etý jáne saýyqtyrýdy uıymdastyrý boıynsha ádistemelik usynymdar ázirledi. Qazaq taǵamtaný akademııasymen birlesip, jańa Tamaqtaný standartynyń talaptaryna sáıkes balalar saýyqtyrý uıymdaryna arnalǵan perspektıvalyq mázir nusqalary ázirlenip jatyr. Bul jumysty osy jyldyń 10 mamyryna deıin aıaqtaý josparlanǵan. Premer-mınıstrdiń orynbasary jazǵy demalys qaýipsiz, sapaly, tanymdyq ári saýyqtyrýǵa baǵyttalǵan bolýy tıis ekenin atap ótti. Sonymen birge jazǵy demalysty oqý protsesiniń jalǵasyna aınaldyrmaý mańyzdy. Barlyq tárbıe, ekologııalyq, mádenı jáne bilim berý is-sharalary balalarǵa qyzyqty, oıyn túrinde ári túsinikti formatta ótkizilýi qajet.
Aıda Balaeva óńirlik shtabtardyń respýblıkalyq shtabpen tyǵyz ózara is-qımyl jasaýy qajet ekenin aıtyp, eń negizgi basymdyq balalardyń qaýipsizdigi ekenin atap ótti. Bul rette úılestirý jumystary memlekettik lagerlerdi de, jeke menshik balalar lagerlerin de qamtýǵa tıis. Sonymen qatar Іshki ister mınıstrligi Oqý-aǵartý mınıstrligimen birlesip, balalar saýyqtyrý lagerleri qyzmetkerleriniń sapalyq quramyna tekserý júrgizedi.
Jıyndy qorytyndylaı kele, Aıda Balaeva jazǵy demalys baǵdarlamalarynyń mazmunyn saýyqtyrý, sporttyq, mádenı, ekologııalyq jáne tanymdyq is-sharalarǵa basymdyq bere otyryp tolyqtyrýdy, balalar qatysatyn kóshpeli is-sharalardyń qaýipsizdik sharalaryn kúsheıtýdi, tamaqtaný sapasyna, aýyz sýǵa jáne lagerlerdiń sanıtarııalyq jaǵdaıyna erekshe baqylaý ornatýdy, mektep janyndaǵy lagerlerdiń daıyndyǵyna taldaý júrgizip, anyqtalǵan kemshilikterdi joıýdy tapsyrdy. Budan bólek Premer-mınıstrdiń orynbasary Memleket basshysynyń bastamasymen júzege asyrylyp jatqan «Jasyl sabaqtar» ekologııalyq jobasynyń elementterin jazǵy baǵdarlamalarǵa engizýdi tapsyrdy.
Aıta ketelik Densaýlyq saqtaý mınıstrligi balalar lagerlerin «kenetten tekserý» formatyna kóshetini týraly jazǵan edik.
