Aıda Balaeva: Balalar ádebıetiniń 20 álemdik bestselleri qazaqshaǵa aýdarylady
«Kúni keshe Ulttyq senim keńesiniń kezekti otyrysynda Memleket basshysy Qasym-Jomart Kemeluly: «...mektep jasyndaǵy balalardy kitap oqý ádetine úıretý» qajettigin basa aıtty. Sondyqtan, bizdiń mınıstrliktiń bastamasymen Y.Altynsarın atyndaǵy Ulttyq bilim akademııasynyń qatysýymen balalar ádebıetiniń 20 álemdik bestsellerleriniń tizimi jasalyp, ishki qarjylyq múmkindikterdi qarastyra otyryp, aýdarmanyń aýdıo elektrondyq nusqasyn jasaý týraly sheshim qabyldandy. Aldaǵy ýaqytta olardy basyp shyǵarý máselesi boıynsha Bilim jáne ǵylym mınıstrligi óz úlesin qosady degen senimdemiz», - dedi mınıstr.
Onyń atap ótýinshe, bul jumystardyń barlyǵy – el ishinde, ásirese, balalar men jastardyń arasynda rýhanı-adamgershilik tárbıe júıesin júzege asyrýdyń birtutas jol kartasyn qalyptastyryp, birneshe múddeli memlekettik organdardyń atsalysýymen iske asyrýdy kózdeıdi.
Eske sala keteıik, Memlekettik hatshy Qyrymbek Kósherbaevtyń tóraǵalyǵymen ótken komıssııa otyrysynda «Rýhanı jańǵyrý» baǵdarlamasyn odan ári tereńdetip Ulttyq jańǵyrý kezeńine ótkizýdiń arnaıy Jol kartasyn jasaý qajet degen sheshim qabyldandy. Bul qujat asa mańyzdy ulttyq joba retinde júrgiziledi.
Ulttyq jańǵyrý jobasynyń eń basty máni – Ulttyń básekege qabilettiligin arttyrý. Bul – ulttyq jańǵyrýdyń strategııalyq maqsaty bolyp qalady. Jol kartasynda Memlekettik til mártebesin arttyrý, Bilim jáne ǵylymdy damytý, Joǵary ulttyq jáne jalpyadamzattyq qundylyqtar negizinde rýhanı-adamgershilik jáne patrıottyq tárbıe berý, Eńbek adamyn qalyptastyrý, Aýyldy túletý sııaqty t.b keshendi is-sharalar qamtylady. Memlekettik hatshy otyrysty qorytyndylaı kele, «Rýhanı jańǵyrý» baǵdarlamasynyń basym baǵyttary boıynsha jumysty odan ári jandandyrý boıynsha naqty tapsyrmalar berdi.
