Aıda Balaeva: Ajyrasý — uıat emes
ASTANA. KAZINFORM — Mádenıet jáne aqparat mınıstri Aıda Balaeva «Bıshimbaev isine» oraı pikir bildirdi.
«Vremıa» gazetiniń tilshisi mınıstrden: «Aıda Ǵalymqyzy, siz Áıelder isteri jáne otbasylyq-demografııalyq saıasat ulttyq komıssııasynyń tóraǵasysyz. «Bıshimbaev isin» qadaǵalap otyrsyz ba? Óıtkeni, qoǵam ádiletsiz úkim shyǵý múmkindigine alańdaýly. Osyǵan oraı qandaı pikir bildirer edińiz?» — dep suraıdy. Osy oraıda, mınıstr ulttyq komıssııanyń tóraǵasy retinde ózi de, komıssııa músheleri de atalǵan sot talqylaýyn jiti qadaǵalap otyrǵandyqtaryn aıtady.
«Sot ashyq formatta ótip jatyr. Bul — taraptardyń talaby. Myńdaǵan adam otyrysty tikeleı efırden kórip otyr, qoǵam, qoǵamdaǵy pikir kóshbasshylary, jýrnalıster protsesti jan-jaqty jazyp jatyr. Sot ádil úkim shyǵaratyndyǵyna senimdimin. Memleket basshysy aıtqan Zań men Tártip ústemdigi qamtamasyz etiledi. Áıel retinde, ana retinde Saltanattyń jaqyndarynyń, onyń anasynyń qaıǵysyna ortaqpyn. Ony soqqyǵa jyqqan sáti beınelengen beıne kadrlardy kórý de óte aýyr. Árıne, ol qazaqstandyqtar úshin turmystyq zorlyq-zombylyqtyń sımvolyna aınalyp úlgerdi jáne de ashyq sot, onyń transparanttiligi áleýetti qylmyskerlerdi ustaýǵa septigin tıgizip, kóptegen ómirdi saqtap qalady de úmittenemin», — dedi Aıda Balaeva.
Osy rette ol barlyq qyz-kelinshekke, áıelderge úndeý jasady.
«Bir ret qol kótergen adam ózgeredi dep eles jeteginde júrýdiń qajeti joq. Ózgermeıdi! Eger ol áıeldi urýǵa, ony qorlaýǵa beıim bolsa, demek ol ónege qaǵıdatynan, adamdyqtyń arylǵan. Shydaýdyń, sen ony, ol seni súıedi, balalar úshin tózý qajet dep, ózińdi de, ony da aldaýdyń keregi joq. Ajyrasý - uıat emes. Uryp-soǵý tek jıilep, kúsheıe túsetindigine senińiz. Jazasyzdyq barlyq ýaqytta da shekten shyǵýǵa alyp keledi. Adamnyń adamgershiligin qorlaýǵa, qol jumsaýǵa eshkimniń de quqyǵy joq. Taǵy da qaıtalap aıtamyn, sot ádil sheshim shyǵaratyndyǵyna nyq senimdimin», — dedi mınıstr.
Eske salsaq, 2023 jyly 9 qarashada Astanadaǵy «Bau» meıramhanasynda burynǵy Ulttyq ekonomıka mınıstri Qýandyq Bıshimbaev óziniń jubaıyn soqqyǵa jyqty. Áıel jedel járdem jetkenshe kóz jumdy. Munan soń Іshki ister mınıstrligi Qýandyq Bıshimbaevtyń ustalǵanyn rastady.
Ótken jyly 15 qarashada ótken keńeste Memleket basshysy Qasym-Jomart Toqaev Іshki ister mınıstrine Q. Bıshimbaevtiń isin erekshe baqylaýǵa alýdy tapsyrdy. Bıyl 11 qańtarda elorda soty Qýandyq Bıshimbaevty kúzetpen ustaý merzimin 2 aıǵa uzartqan edi, 26 aqpanda Qýandyq Bıshimbaevtyń isi sotqa tústi.
1 naýryzda Qýandyq Bıshimbaevtyń isi boıynsha aldyn ala tyńdaý kúni belgilendi. 11 naýryz kúni Astananyń Qylmystyq ister jónindegi mamandandyrylǵan aýdanaralyq sotynda is boıynsha aldyn ala tyńdaý ótti. Aldyn ala tyńdaý 12 naýryzda jalǵasty.
