Aıda Balaeva Azamattyq qoǵamdy damytýdyń tujyrymdamasy týraly aıtty
«Mınıstrlik jumysynyń kelesi bir úlken baǵyty – halyq únine qulaq asatyn memleket pen aqparatty qoljetimdi etý. Árıne, bul barlyq memlekettik organdarǵa ortaq mindetter. «Halyqtyń únine qulaq asatyn memleket» ıdeıasy qazir qoǵamnyń qyzý qoldaýyn taýyp, shyn máninde úlken úmit kútetin kontseptsııa bolyp otyr. Onyń aıasynda osy ýaqytqa deıin biraz sharýa atqaryldy. Máselen, mınıstrlik basshylyǵynyń azamattardy turaqty túrde qabyldaýy men olardyń ótinish-tilekterin baqylaý isi bir júıege keltirilgen. Mınıstrdiń jeke blogy da úzdiksiz jumys isteıdi», - dedi mınıstr Ortalyq kommýnıkatsııalar qyzmetinde onlaın rejımde ótken halyqqa esep berý kezdesýi barysynda.
Budan bólek, barlyq memlekettik organdarda qoǵamdyq jáne onlaın qabyldaý oryndary ashyldy. Osy oraıda, memlekettik organdardyń ınternet saıttaryn biriktirip, azamattardyń ótinishi túsetin Tutas platforma jasaldy. Barlyq óńirlerde «109» baılanys ortalyqtary jumys jasap, ákimdikterde «bir tereze» prıntsıpimen qyzmet kórsetetin front-ofıster ashyldy.
«Mine, búgingi bizdiń esep berý kezdesýimiz sııaqty barlyq sharalar qazir tek onlaın-translıatsııa arqyly ótedi. Osynyń barlyǵy - «Halyqtyń únine qulaq asatyn memleket» kontseptsııasynyń qanshalyqty tıimdi ekendigin dáleldedi. Sondyqtan da, bizdiń mınıstrlik tarapynan osy kontseptsııaǵa óte mańyzdy strategııalyq qujattyń jobasy engizilip otyr. Ol –Azamattyq qoǵamdy damytýdyń 2025 jylǵa deıingi kontseptsııasy. Bul, eń aldymen, memlekettik apparattyń qyzmet kórsetý sapasyn arttyrý men azamattyq qoǵamnyń sheshim qabyldaý úrdisterine qatysý belsendiligin arttyrý úshin qajet», - dedi A. Balaeva.
