Aıda Balaeva: Azamattyq qoǵam halyqtyń áleýmettik jaǵdaıyn jaqsartýǵa atsalysýy kerek

ALMATY. QazAqparat– Azamattyq qoǵam ınstıtýttary halyqtyń áleýmettik-ekonomıkalyq jaǵdaıyn jaqsartýǵa atsalysýy kerek. Bul týraly «Qoǵamdyq senim jáne áleýmettik kapıtal» atty halyqaralyq onlaın konferentsııa barysynda Aıda Balaeva aıtty, dep habarlaıdy QazAqparat tilshisi.

Halyqaralyq konferentsııa qatysýshylary memlekettik organdar men azamattyq qoǵam arasynda senimdi qarym-qatynas ornatý úshin álýmettik kapıtaldyń yqpaly men osy úderisti tejep otyrǵan máselelerdi kóterdi.

«Elbasy belgilep bergen «Rýhanı jańǵyrý» baǵdarlamasynyń basymdyqtary men memleket basshysy Qasym-Jomart Toqaev aıqyndap bergen «Halyq únine qulaq asatyn memleket» tujyrymdamasynyń basty maqsattarynyń biri – qoǵamdyq sanany jańǵyrtyp, elimizde jańa saıası mádenıetti qalyptastyrý jáne ózara ornyqtyrý. Sonymen qatar, Prezıdent bastamasymen qurylǵan Ulttyq qoǵamdyq senim kenesi búgingi tańda halyq pen memleket arasyndaǵy altyn kópirge aınalyp, qoǵamnyń bılikke degen senimin arttyrýǵa yqpal etip otyr. Bul jobalar dala danyshpandary Abaı men ál-Farabıdiń rýhanı muralaryna adaldyǵymyzdy aıǵaqtaıdy»,– dedi Qazaqstan Respýblıkasynyń Memlekettik hatshysy Qyrymbek Kósherbaev.

Óz kezeginde QR Aqparat jáne qoǵamdyq damý mınıstri Aıda Balaeva bul sharanyń ýnıversıtet qabyrǵasynda ótýi kezdeısoq emes ekenin atap ótti.

«Almaty menedjment ýnıversıteti - azamattyq qoǵamnyń damýy men áleýmettik áriptestiktiń nyǵaıýyna erekshe úles qosyp otyrǵan bilim ordasynyń biri. Azamattyq qoǵam ınstıtýttary halyqtyń áleýmettik ekonomıkalyq jaǵdaıyn jaqsartýǵa qatysýy kerek. Bul mańyzdy. Muny Memleket basshysy Qasym-Jomart Kemeluly Toqaev óz Joldaýynda atap ótti. Prezıdent halyqtyń memleketke degen senimin arttyrý, «Halyq únine qulaq asatyn» tujyrymdamasy arqyly memleketti qalyptastyrý mindetterin alǵa qoıdy»,– dedi Aıda Balaeva.

Sonymen qatar, ol bıyl Memleket basshysynyń jarlyǵymen Qazaqstan Respýblıkasynda azamattyq qoǵamdy damytý kontseptsııasy bekitilgenin jetkizdi.

«Qujat memlekettik organdar men qoǵam arasyndaǵy ózara qarym-qatynastyń basty basymdyqtary men mindetterin, eldegi áleýmettik áriptestikti damytýdyń tetikterin aıqyndaıdy»,– dedi QR Aqparat jáne qoǵamdyq damý mınıstri.

Aıta keteıik, Almatyda «Qoǵamdyq senim jáne áleýmettik kapıtal» atty halyqaralyq onlaın konferentsııa ótip jatyr.