Aıda Balaeva: Áıelder — el ekonomıkasynyń qozǵaýshy kúshi
ALMATY. KAZINFORM — Almatyda BeWoman Asia 2025 forýmy ótip jatyr. Forýmnyń ashylýynda sóz alǵan Mádenıet jáne aqparat mınıstri Aıda Balaeva zamanaýı Qazaqstan áıeliniń kelbetin sıpattady.
Mınıstr elimizdegi áıel beınesi — tek qana qurǵaq statıstıka emes, ol — mıllıondaǵan áıeldiń eńbegi, bilimimen jazylyp jatqan el tarıhy ekenin atap ótti.
— Bizdiń áıelderimiz — búgingi kúni ekonomıkanyń qozǵaýshy kúshi. Qazaqstandaǵy shaǵyn jáne orta bıznes sýbektileriniń 48,2 paıyzyn áıelder basqarady. Jeke kásipkerlerdiń ishinde úlesi 53,4 paıyzǵa jetedi, — dedi ol.
Aıda Balaevanyń aıtýynsha, qazaqstandyq áıelder senimdi túrde jańa salalaryna qadam basyp jatyr: stýdent qyzdardyń 30 paıyzdan astamy STEM-baǵyttaryn tańdaıdy, al IT jáne tsıfrlyq ekonomıka salasynda 31 paıyz áıel eńbek etedi. Eldegi eń iri tehnopark — Astana Hub-ta ár jetinshi startapty áıelder qurǵan.
Memlekettik basqarý júıesinde de áıelderdiń orny aıryqsha. Búginde memlekettik qyzmetshilerdiń 55,8 paıyzy — áıelder. Sýdıalardyń ishinde 53 paıyzdan astamy, Parlament depýtattarynyń shamamen 20 paıyzy — áıel. Dıplomatııa men áskerı salada olardyń úlesi ázirge az: elshilerdiń — 4 paıyzy, polıtsııa qyzmetkerleriniń — 16 paıyzy, áskerdegi joǵary laýazymdarda — 4,4 paıyz.
— Degenmen, bul baǵyttar bolashaqta ósýdiń jańa kókjıegin ashyp otyr, — dedi mınıstr.
Sondaı-aq Aıda Balaeva qazaqstandyq áıelderdiń áleýmettik jáne demografııalyq kórsetkishterin atap ótti. Ortasha ómir súrý uzaqtyǵy — 75-80 jas. Áıelderdiń saýattylyq deńgeıi — 99,9 paıyz. Árbir besinshi áıeldiń joǵary bilimi bar. Qazaqstan ýnıversıtetterindegi stýdentterdiń teń jartysy — qyzdar. Ǵylymı salada zertteýshilerdiń 55,7 paıyzy áıelder.
— Qazaqstandyq áıel — zamanaýı, bilimdi, ekonomıkalyq belsendi, áleýmettik jaýapty azamat. Ol kásip júrgizedi, memlekettik jobalardy basqarady, zerthanalarda, aýyl sharýashylyǵynda, bızneste, memlekettik qyzmette eńbek etedi. Sonymen qatar ol — qamqor qyz, jar, meıirimdi ana, — dedi mınıstr.
Eske salaıyq, buǵan deıin Astana, Almaty men Shymkent ákimdiginiń basshylyǵynda qansha áıel bar ekenin jazǵanbyz.