Aıda Balaeva Ata zań ózgeristerin «Konstıtýtsııanyń jańa jobasy» dep qarastyrýdy usyndy

ASTANA. KAZINFORM — Premer-mınıstr orynbasary — Mádenıet jáne aqparat mınıstri Aıda Balaeva Konstıtýtsııalyq komıssııanyń besinshi otyrysynda usynylǵan túzetýler mátinin «Konstıtýtsııanyń jańa redaktsııasy» dep emes, «Konstıtýtsııanyń jańa jobasy» dep qarastyrýdy usyndy. 

− Jan-jaqty talqylaýlar men usynystardy saralaı kele, keshe tanystyrylǵan mátindi «Konstıtýtsııanyń jańa redaktsııasy» dep emes, «Konstıtýtsııanyń jańa jobasy» dep qarastyrý usynysyn qoldaımyn, − dedi Mádenıet mınıstri.

Sonymen birge, saıası partııalardyń róli men partııalyq tizimniń orny týraly aıtqan mınıstr saılaýshylardyń jeke azamatqa emes, eń laıyqty degen tulǵalardyń ortaq oıyna, ozyq ıdeıalaryna daýys beretinin atap ótti.

− Bul el ómirine, saıası básekege, sapaly saraptama, mazmundy pikirtalas sııaqty qajetti dúnıelerdi ákelip qana qoımaıdy. Eń bastysy bul saıası partııalardy óz saılaýshylarynyń úmiti men múddesin dál túsinýge jáne eldiń ortaq maqsatyna qyzmet etetin mańyzdy máselelerdi sheshýge múmkindik beredi. Sol arqyly memleket pen azamattar arasyndaǵy shyn mánindegi altyn kópirge aınalýyn tezdetedi. Qorytyndylaı aıtsaq, Memleket basshysy usynǵan ózgerister − kezekti bir túzetýler emes, azamattarymyzdyń muń-muqtajyn eskeretin, ádildikti tý etip, zań men tártipke negizdelgen el damýynyń uzaq merzimdi tyń modeli, − dedi Aıda Balaeva. 

Aıta ketelik Konstıtýtsııalyq reformalar jónindegi komıssııanyń (Konstıtýtsııalyq komıssııa) kezekti otyrysynda Májilis depýtaty Sergeı Ponomarev Halyq keńesiniń quramy men ókilettigi týraly aıtqan edi.