Aıda Balaeva áskerı reforma josparynyń negizgi erejelerin tanystyrdy
ASTANA. KAZINFORM — Prezıdent Qasym-Jomart Toqaevtyń tóraǵalyǵymen Qazaqstan Respýblıkasy Qaýipsizdik Keńesiniń otyrysy ótti. Otyrysta Qaýipsizdik Keńesi Tóraǵasynyń orynbasary Aıda Balaeva áskerdi jasaqtaýdyń halyqaralyq tájirıbesin, urys qımyldaryn júrgizýdiń zamanaýı tásilderin jáne otandyq mamandardyń usynystaryn eskere otyryp ázirlengen Jospardyń negizgi erejelerin tanystyrdy. Bul týraly Aqorda habarlady.
Qujatta memlekettiń búkil áskerı júıesiniń tıimdiligin arttyrýǵa baǵyttalǵan ınstıtýtsıonaldyq ózgerister kózdelgen.
Atap aıtqanda, Qarýly Kúshterdiń qurylymy men quramyn qaıta qaraý, basqarý jáne qorǵanysty josparlaý tetikterin jetildirý, Ushqyshsyz júıeler kúshterin qurý, sondaı-aq armııanyń negizgi komponentterin nyǵaıtý josparlanyp otyr.
Bul reformanyń mańyzdy aspektisi – merzimdi áskerı qyzmettiń eki kezeńnen turatyn úlgisine kóshý. Áskerge shaqyrylǵandar alǵashqy alty aıda oqý ortalyqtarynda daıarlyqtan ótedi. Keıingi alty aıda tikeleı áskerı bólimderde qyzmet etedi. Bul kezeńde jaýyngerlik daıarlyqqa jáne bólimsheler quramynda mindetterdi oryndaýǵa basymdyq beriledi.
Áskerı qyzmetshilerdiń qaýipsizdigin qamtamasyz etýge jáne quqyqtaryn qorǵaýǵa erekshe nazar aýdarý qajet.
Áskerı konsýltanttar men Áskerı qyzmetshiler isteri jónindegi ýákil ınstıtýttaryn qurý josparlanyp otyr. Sondaı-aq jarǵyǵa saı kelmeıtin is-áreketke jol bermeý jáne áskerı tártipti kúsheıtý sharalary qabyldanady.
Sonymen qatar «Adal azamat» tujyrymdamasyna negizdelgen «Jas aıbyn» biryńǵaı áskerı-patrıottyq daıarlyq júıesin damytý, mamandandyrylǵan áskerı mektepter jelisin keńeıtý jáne bastapqy áskerı daıarlyqty jetildirý kózdelgen.
Qaýipsizdik keńesi otyrysyndaǵy negizgi – másele áskerı reforma josparynyń jobasy.
