Aıda Balaeva álemdik shyǵarmalardy qazaq tiline aýdarý bastamasy jaıynda aıtty
«Erekshe toqtalatyn dúnıe ol – Elbasynyń kúni keshe Assambleıa otyrysynda erekshe kótergen ulttyń tili. «Til taǵdyry – el taǵdyry». Endeshe, ulttyń dúnıetanymyn onyń ózine tán ereksheligimen durys nasıhattaý – eń aldymen sol ulttyń tól tilinde júrgizilýi qajet. Sonyń ishinde erteńgi qoǵamnyń qozǵaýshy kúshi – búgingi jas urpaqty memlekettik tilge úıretý – basty maqsat sanaımyz. Tereń túsinikpen qarasaq bul – búgingi jahandaný dáýirinde ulttyq bolmysty saqtaıtyn birden-bir basty talap», - dep toqtaldy mınıstr Senatta «Ulttyq qundylyqtar – rýhanı jańǵyrýdyń negizi» taqyrybyndaǵy dóńgelek ústel otyrysynda.
Sonymen qatar A. Balaeva balalarǵa til úıretý sharalaryna toqtaldy.
«Balalardyń tilin qalyptastyratyn qural – árıne birinshi kezekte – telearnalardaǵy mýltıplıkatsııalyq fılmder men balalar ádebıeti. Bul turǵyda, Aqparat jáne qoǵamdyq damý mınıstrligi «Nickelodeon», Disney, TiJi telearnalarynyń ónimderi men balalar ádebıetiniń álemdik shyǵarmalaryn qazaq tiline aýdarý bastamasyn kóterip otyr. Eger Úkimet tarapynan tıisti qarjylyq qoldaý tapqan jaǵdaıda, bul – bolashaq úshin qaıtarymy mol, nátıjesi zor joba bolady dep senemiz», - dedi vedomstvo basshysy.
