Aıda Balaeva: Áke – otbasynyń tiregi, ult tárbıesiniń temirqazyǵy
ASTANA. KAZINFORM — QR Premer-mınıstriniń orynbasary — Mádenıet jáne aqparat mınıstri Aıda Balaeva qazaqstandyqtardy Ákeler kúnimen quttyqtap, ákeniń otbasy men qoǵamdaǵy erekshe rólin atap ótti.
Mınıstrdiń aıtýynsha, qazaq qoǵamynda áke árdaıym otbasynyń tiregi, urpaq tárbıesiniń temirqazyǵy sanalyp keledi. Búginde otbasy ınstıtýtyn nyǵaıtý jáne jaýapty áke bolýdy damytý memlekettik saıasattyń mańyzdy baǵyttarynyń biri bolyp otyr.
— Búgingi qazaqstandyq áke — tek otbasynyń asyraýshysy men qorǵany ǵana emes, bala tárbıesine belsene aralasatyn, onyń jan dúnıesin túsinip, bolashaǵyna baǵyt-baǵdar beretin tulǵa. Ákeniń qamqorlyǵy, senimi men perzentimen birge ótkizgen árbir sáti urpaqtar arasyndaǵy rýhanı baılanysty nyǵaıtyp, eliniń erteńine jaýapty azamattardy tárbıeleýge qyzmet etedi, — dedi Aıda Balaeva.
Onyń atap ótýinshe, otbasy qundylyqtarynyń mańyzy Qazaqstan Konstıtýtsııasynda da aıqyn kórinis tapqan. Qazirgi ýaqytta elimizdiń barlyq óńirlerinde mektepter janynan qurylǵan 500-den astam Ákeler keńesi jumys isteıdi. Sonymen qatar «Ákeler odaǵy» men «Ata-analar akademııasy» jobalary ata-analardyń tárbıelik áleýetin arttyrýǵa baǵyttalǵan.
Mınıstr barlyq ákelerge zor densaýlyq, baq-bereke tilep, Ákeler kúnimen quttyqtady.
Aıta keteıik, maýsym aıynyń úshinshi jeksenbisinde elimizde ákeler kúni atap ótiledi. Mereke qarsańynda túrli mádenı-sporttyq sharalar, áleýmettik jobalar júzege asatyn dástúr bar. Óskeleń urpaqqa ákeler ınstıtýtynyń mańyzyn uǵyndyratyn jıyn qatary da kóbeıedi. Osy oraıda Kazinform agenttiginiń analıtıkalyq sholýshysy otbasydaǵy ákeniń sıpatyna úńilip, qoǵamnyń búgingi kózqarasyn taldady.
