Aıda Balaeva «Art-zerthana» kórkemsýret stýdııasymen tanysty
ASTANA. KAZINFORM – Á.Qasteev atyndaǵy Ulttyq óner mýzeıinde jańǵyrtylǵan «Art-zerthana» mýzeılik kórkemsýret stýdııasy tanystyryldy. Munda jyl saıyn 3 myńǵa jýyq bala men eresek shyǵarmashylyqpen aınalysa alady.
Іs-sharaǵa QR Premer-mınıstriniń orynbasary – Mádenıet jáne aqparat mınıstri Aıda Balaeva, «Samuryq-Qazyna» AQ basqarma tóraǵasy Nurlan Jaqypov, Á.Qasteev atyndaǵy QR Ulttyq óner mýzeıiniń dırektory Gúlaıym Jumabekova, elimizdiń mádenıet jáne óner qaıratkerleri, sheberler men mýzeılik kórkemsýret stýdııasynyń shákirtteri qatysty.
«Art-zerthana» – mýzeı pedagogıkasy aıasynda 2007 jyldan beri júzege asyrylyp kele jatqan Ulttyq óner mýzeıiniń shyǵarmashylyq-bilim berý jobasy. Onyń basty maqsaty – balalardyń, jasóspirimderdiń, jastar men eresekterdiń beıneleý ónerine qyzyǵýshylyǵyn arttyryp, shyǵarmashylyq áleýetin ashý.
Kásibı sýretshi-pedagogterdiń jetekshiligimen akademııalyq sýret, keskindeme, kompozıtsııa, grafıka, sándik-qoldanbaly óner jáne shyǵarmashylyq izdenistiń túrli baǵyttary boıynsha sabaqtar ótkiziledi. Joba júzege asyrylǵan ýaqyttan beri stýdııada 10 myńnan astam bala men jasóspirim bilim aldy.
Sonymen qatar stýdııa erekshe bilim berý qajettilikteri bar balalarǵa arnalǵan shyǵarmashylyq baǵdarlamalardy júıeli túrde júzege asyryp, ınklıýzıvti mýzeılik bilim berý qaǵıdattaryn damytýǵa úles qosyp keledi.
Jańǵyrtylǵan jobanyń tanystyrylymynda Aıda Balaeva ónerdi damytýǵa memlekettik qoldaý kórsetý, jastardy shyǵarmashylyqqa baýlý jáne olardyń qabiletin ashýǵa qolaıly jaǵdaı jasaý mádenıet saıasatynyń mańyzdy basymdyqtarynyń biri ekenin atap ótti.
– Memleket basshysy mádenıet salasyna aıryqsha kóńil bólip keledi. Salany qoldaýǵa baǵyttalǵan júıeli memlekettik saıasattyń arqasynda búginde naqty nátıjelerge qol jetkizdik. 2025 jyly Qazaqstan Ortalyq memlekettik mýzeıi men Ábilhan Qasteev atyndaǵy Memlekettik óner mýzeıine, al 2026 jyly Ulttyq mýzeıge «Ulttyq» mártebesi berildi. Sonymen qatar Prezıdenttiń tapsyrmasy boıynsha byltyr «Samuryq-Qazyna» qory Qasteev mýzeıinde aýqymdy jóndeý jumystaryn júrgizdi. «Qazaqstannyń eńbek sińirgen sýretshisi» qurmetti ataǵynyń taǵaıyndalýy da mańyzdy sheshimniń biri boldy. Bul otandyq beıneleý óneriniń qoǵamdaǵy ornyna berilgen joǵary baǵa ári óz isine adaldyqpen qyzmet etip kele jatqan sýretshilerdiń kópjyldyq eńbegine kórsetilgen laıyqty qurmet. Osy múmkindikti paıdalana otyryp, mádenıet salasynyń barsha ókilderiniń jáne jeke ózimniń atymnan Memleket basshysyna salaǵa kórsetip kele jatqan turaqty qoldaýy úshin shynaıy rızashylyǵymdy bildiremin, – dedi Premer-mınıstrdiń orynbasary.
«Samuryq-Qazyna» qorynyń qoldaýymen júzege asyrylǵan joba aıasynda mýzeıdiń shyǵarmashylyq keńistigi jańǵyrtyldy. Aýmaǵy 110 sharshy metrden asatyn zerthana keskindeme, grafıka jáne sándik-qoldanbaly óner sabaqtaryn ótkizýge arnalǵan zamanaýı qural-jabdyqtarmen qamtamasyz etildi.
Sonymen qatar stýdııada shyǵarmashylyq jumystardy tanystyrýǵa arnalǵan, zamanaýı fotoapparatýramen jabdyqtalǵan arnaıy fotokeńistik quryldy. Bul shákirtterge óz týyndylaryn kásibı deńgeıde tanystyryp, shyǵarmashylyq jetistikterin tsıfrlyq keńistikte keńinen kórsetýge múmkindik beredi. Munda 5 pen 17 jas aralyǵyndaǵy balalar men jasóspirimderge arnalǵan sheberlik sabaqtary, shyǵarmashylyq praktıkýmdar jáne tabıǵat aıasyndaǵy sýret salý sabaqtary ótkiziledi.
– Art-zerthana» jas daryndar bas qosatyn shyǵarmashylyq ortaǵa aınalyp, olardyń damýyna jáne tyń izdenisterine jańa múmkindikter beredi dep senemin. «Samuryq-Qazyna» úshin mádenıetti qoldaý – ulttyq muramyzdy saqtaýǵa jáne zamanaýı mádenı ortany damytýǵa qosylǵan úles, – dedi Nurlan Jaqypov.
Aıta keteıik, stýdııa shyǵarmashylyq qabileti joǵary balalar men jastardy qoldaýǵa, olardyń bolashaq mamandyǵyn durys tańdaýyna erekshe kóńil bóledi. Daryndy shákirtterdi joǵary jáne orta arnaýly kórkemóner oqý oryndaryna túsýge daıarlap, shyǵarmashylyq áleýetiniń damýyna jáne bolashaq sýretshi retinde qalyptasýyna yqpal etedi.
Іs-shara aıasynda qonaqtarǵa mýzeıdiń tsıfrlyq portaly da tanystyryldy. Jańǵyrtylǵan portaldyń qoldanysy barynsha yńǵaıly ári ınklıýzıvti bola tústi. Endi kelýshiler mýzeı kollektsııasy men kórmelerin onlaın tamashalaı alady. Al 3D-týr kez kelgen jerden mýzeı keńistigine vırtýaldy saıahat jasap, ekspozıtsııalarmen tanysýǵa múmkindik beredi.
Ábilhan Qasteev atyndaǵy Ulttyq óner mýzeıinde ótken «Mýzeı túni» aktsııasyna 15 myńnan astam adam qatysqanyn jazǵan edik.
