Aıda Balaeva aǵza donorlyǵyna kelisim beretinin aıtty
ASTANA. KAZINFORM — Premer-mınıstrdiń orynbasary — mádenıet jáne aqparat mınıstri Aıda Balaeva Facebook-tegi paraqshasynda aǵza donorlyǵyna qatysty pikir bildirdi.
Onyń sózinshe, qazir elimizde 4739 adam transplantatsııa kezeginde tur.
— Bul degenińiz — 4739 úkili úmit, eljiregen júrek, jaltaqtaǵan janar. Olardyń arasynda 125 bala bar. Qazaqstanda transplantatsııalardyń shamamen 90 paıyzy tiri týystyq donorlardyń qatysýymen jasalady. Al qaıtys bolǵannan keıingi donorlyqtyń úlesi 10 paıyzǵa da jetpeıdi, — dep jazdy Aıda Balaeva.
Premer-mınıstrdiń orynbasary aǵza donorlyǵyna qatysty sheshimge eshkimdi májbúrleýge bolmaıtynyn atap ótti. Sebebi donor bolý nemese bolmaý — ár adamnyń jeke tańdaýy.
— Bul — óte názik ári kúrdeli másele. Mundaı sheshimge eshkimdi májbúrleýge bolmaıdy. Menińshe, bul taqyrypta eń mańyzdysy — eki taraptyń da jaǵdaıyn túsine bilý. Bir jaǵynda — aǵza kútip, ómirden úmitin úzbeı júrgen adamdar bolsa, ekinshi jaǵynda — eń jaqyn adamynan aıyrylyp, orny tolmas qaıǵyny bastan keship jatqan otbasy tur. Sondyqtan osy eki jaǵdaıdyń arasyndaǵy názik shekara árdaıym saqtalýy kerek. Bul jerde eshqandaı qysym da, aıyptaý da bolmaýy tıis. Tek ár adamnyń tańdaýy men ár otbasynyń sheshimine degen qurmet bolýy qajet, — dedi ol.
Mınıstr aǵzalaryn donorlyqqa berýge kelisim beretinin aıtty. Aıda Balaeva málim etkendeı, bir adamnyń sheshimi basqa bir adamǵa ómir súrýge múmkindik syılaıdy.
— Al endi meniń óz basyma kelsem… Kúnderdiń kúninde jaqyndarymnyń aldyna dál osyndaı tańdaý tursa, onda, sóz joq, ómirge qaıta oralǵysy keletin adamdarǵa kómektesýdiń mańyzyn túsingenin qalar edim. Men aǵzalarymdy donorlyqqa berýge kelisim beretinimdi jaýapkershilikpen atap ótkim keledi. Sebebi bir adamnyń sheshimi basqa bir adamǵa ómir súrýge múmkindik berýi múmkin. Sondyqtan biz bul taqyrypty qorqynyshpen emes, túsinistikpen, jaýapkershilikpen jáne adam ómirine degen qurmetpen talqylaýymyz kerek dep oılaımyn. Óıtkeni adam ómirinen qymbat eshteńe joq. Al ony saqtap qalýǵa baǵyttalǵan árbir izgi qadamnyń mańyzy zor. Transplantatsııaǵa muqtaj ár adamnyń artynda ómirge degen úlken úmit tur. Sol úmitti úzbeý — barshamyzǵa ortaq adamgershilik mindet dep oılaımyn, — dep túıindedi Balaeva.
Aıta keteıik, buǵan deıin Qazaqstanda qaıtys bolǵannan keıin aǵza donory bolýǵa kelisim bergender sany artqany habarlandy.
Sonymen qatar, aǵzasyn donorlyqqa bergisi keletinder neden qorqatyny belgili boldy.
Jalpy elde búginge deıin 3 270 aǵza transplantatsııasy jasalǵan.
