Aıda Balaeva: Adamdardyń ósek-aıańǵa senýine ózimiz túrtki bolamyz

NUR-SULTAN. QazAqparat - Memlekettik organdardyń ınternet-resýrstarynyń biryńǵaı tuǵyrnamasyna áli de birqatar memlekettik jáne jergilikti atqarýshy organ kóshken joq. Bul týraly QR Tsıfrlyq damý jáne aeroǵarysh ónerkásibi vıtse-mınıstri Abylaıhan Ospanov aıtty, dep habarlaıdy QazAqparat tilshisi.

«Memlekettik organdardyń ınternet-resýrstarynyń biryńǵaı tuǵyrnamasy Qazaqstan Respýblıkasynyń memlekettik aqparat saıasatyn iske asyrý máseleleri jónindegi komıssııanyń 7 maýsymdaǵy №3 hattamasyna sáıkes iske asyrylyp jatyr. Búgingi kúni osy ınternet-resýrstardyń biryńǵaı tuǵyrnamasyna 76 memlekettik organ men 17 jergilikti atqarýshy organdy kóshirýdi josparladyq. Biraq, búgingi kúni olardyń ishinen 69 memlekettik organ men 12 jergilikti atqarýshy organ kóshirildi. Osy sharany ary qaraı jalǵastyrý kerek. Sol sebepten bizdiń tarapymyzdan usynys - osy qalǵan 7 memlekettik organ jáne 5 jergilikti atqarýshy organ jedel túrde ınternet-resýrstarynyń biryńǵaı tuǵyrnamasyna kóshirilse», - dedi vıtse-mınıstr Aqparatqa qol jetkizý máseleleri jónindegi komıssııanyń otyrysynda.

Onyń atap ótýinshe, jergilikti atqarýshy organdardan Nur-Sultan, Almaty jáne Atyraý, Aqtóbe, jáne Jambyl oblystary ınternet-resýrstardyń biryńǵaı tuǵyrnamasyna kóshýleri qajet.

«Biz oqytý kýrstaryn ótkizdik. Búgingi kúnge deıin 623 memlekettik qyzmetshiler oqytyldy. 863 memlekettik qyzmettiń pasporttary toltyryldy. Tıisti jumys atqarylyp jatyr. Osy jyldyń sońyna deıin josparlanǵan jumystardy oryndaımyz dep úmittenemin», - dedi Abylaıhan Ospanov.

Osy rette otyrysqa tóraǵalyq etken QR Aqparat jáne qoǵamdyq damý mınıstri Aıda Balaeva joǵaryda atalǵan óńirlerdiń ákimdikterine ınternet-resýrstardyń biryńǵaı tuǵyrnamasyna kóshýlerin jedeldetý qajettigin eskertti. Sonymen qatar mınıstr biryńǵaı tuǵyrnamada aqparat júıeli túrde jańaryp otyrýy qajettigin basa aıtty.

«Keıde aılap aqparat jańartylmaıdy. Bizge der ýaqytynda berilmegen, eskirip ketken aqparattyń qajeti qansha? Bul da úlken másele. Sebebi aqparat barlyq ýaqytta da ózekti bolýy tıis. Biz qate aqparat tarady dep, adamdar ósek-aıańǵa senedi dep renjımiz. Túptep kelgende mundaı jaıttyń oryn alýyna resýrstardaǵy aqparattardy júıeli túrde jańartpaı ózimiz túrtki bolyp otyrmyz. Sondyqtan memlekettik organdar resýrstardaǵy aqparattardy júıeli túrde jańartyp otyrý máselesin erekshe baqylaýǵa alý tıis»,- dedi Aıda Balaeva.

Aıta keteıik, onlaın formatta ótken Aqparatqa qol jetkizý máseleleri jónindegi komıssııanyń otyrysynda múmkindigi shekteýli adamdardyń aqparatqa qol jetkizý máseleleri, memlekettik organdardyń ashyqtyq deńgeıin jyl saıynǵy baǵalaýdyń negizgi qorytyndylary, memlekettik organdardyń ınternet-resýrstarynyń biryńǵaı tuǵyrnamasynyń jumysy, sondaı-aq «Ashyq bıýdjetter» portalyn jetildirý boıynsha jumys josparynyń oryndalýy talqylandy.