Aıda Balaeva 18 daryndy ónerpazdy marapattady

ASTANA. KAZINFORM - Qazaqstan Respýblıkasy kúnine oraı «Astana Opera» teatrynda QR Mádenıet jáne aqparat mınıstri Aıda Balaeva bedeldi halyqaralyq baıqaýlardyń júldegerlerimen kezdesti, dep habarlaıdy mınıstrliktiń baspasóz qyzmeti.

Kezdesýge kelgen jas ónerpazdardyń qatarynda Italııadaǵy La Scala teatry akademııasynyń stýdenti, Portofıno qalasynda ótken XI halyqaralyq «CLIP 2025» opera baıqaýynyń Gran-prı ıegeri – Áıgerim Altynbek, Dýbaıda ótken «Sanremo Best Song – 2025» halyqaralyq oryndaýshylar baıqaýynyń jeńimpazy – Erjan Maksım, Qazanda ótken XXI halyqaralyq «Novaıa volna – 2025» jas oryndaýshylar baıqaýynyń jeńimpazy – Aleksandr Lım, Máskeýde ótken halyqaralyq «Intervıdenıe – 2025» mýzykalyq baıqaýynyń qatysýshysy – Ernar Sadyrbaev (Amre), Vıtebskide ótken XXXIV halyqaralyq «Vıtebsk 2025» baıqaýynyń Gran-prı ıegeri Almagúl Battalıeva, sondaı-aq Stavropolde ótken «Soldier’s Envelope – 2025» halyqaralyq festıval-baıqaýynyń jeńimpazy, «El Voice» toby men Italııadaǵy «Open Italy – 2023» baıqaýynda úzdik dep tanylǵan dombyrashylar dýeti «Temirlan & Yernat» jáne basqa da daryndy jastar boldy.

Aıda Balaeva olarǵa QR Mádenıet jáne aqparat mınıstrligi atynan alǵys hat tabystady. Mınıstrdiń aıtýynsha, jas talanttardyń jetistikteri Qazaqstannyń halyqaralyq bedelin arttyrýǵa jáne el mádenıetin tanytýǵa zor úles qosady.

«Búgin mereke qarsańynda, biz el mádenıetiniń damýyna úles qosyp júrgen jastarmen kezdesip otyrmyz. Sizderdiń halyqaralyq deńgeıdegi jetistikterińiz — elimizdiń abyroıy men bedeli. Ár ónerpazdyń eńbegi men darynyn joǵary baǵalaımyn. El men jerge, óz isine degen súıispenshilik osyndaı jeńiske jeteledi. Sizderdi tárbıelegen ata-analaryńyz ben ustazdaryńyzǵa alǵys bildiremin. Óıtkeni olardyń sizderdi ónerge baýlyp, tańdaýlaryńyzdy qoldaýda eńbegi zor», — dedi Aıda Balaeva.

Otyrys barysynda jastar jetistikteri men josparlary týraly sóz etti. Sonymen qatar mádenıet salasyn damytý jáne jas talanttardy memlekettik qoldaý baǵyty boıynsha da óz usynystaryn jetkizdi.

Sońǵy jyldary otandyq oryndaýshylar, ártister men mýzykanttar halyqaralyq bedeldi baıqaýlarda joǵary kásibı deńgeıimen tanylyp, el abyroıyn asqaqtatyp júr.
Respýblıkalyq jáne halyqaralyq baıqaýlardyń júldegerleri atanǵan oqýshylar men stýdentter sany (mádenıet salasyndaǵy oqý oryndary tárbıelegen) 14,9 % artty. Tek 2025 jyldyń ózinde shyǵarmashylyq joǵary oqý oryndary men kolledjderdiń 1511 stýdenti laýreat jáne dıplomant atanǵan.

-Bul jetistik – QR Mádenıet jáne aqparat mınıstrligi ázirlegen mádenıet salasyndaǵy bilim berýdi damytý jáne jastardyń shyǵarmashylyq áleýetin yntalandyrý boıynsha jasalǵan júıeli sharalardyń jemisti nátıjesi,-delingen QR Mádenıet jáne aqparat mınıstrliginiń baspasóz qyzmeti taratqan habarlamada.

Osyǵan deıin QR Ulttyq mýzeıde «Oǵyz dalalyq mádenıetiniń izderi» atty halyqaralyq kórme ótkeni týraly jazdyq.