AIBA-nyń ádeti sol, erejeni aýystyra beredi - Ermaxan Ybyraıymov
ASTANA. QazAqparat - Sıdneı Olımpıadasynyń chempıony Ermaxan Ybyraıymovtyń aıtýynsha, Halyqaralyq áýesqoı boks qaýymdastyǵy (AIBA) erejeni aýystyrsa da, tóreshildiktiń ádil bolatynyna kepil joq. Sebebi atalǵan uıym erejeni Olımpıada ótken saıyn aýystyryp otyrady, dep xabarlaıdy QazAqparat tilshisi.
"Shynyna kelgende, AIBA Olımpıada ótken saıyn úlken daý-damaıdyń arasynda qalyp otyrady. Sosyn árbir Olımpıadadan keıin mindetti túrde erejeni aýystyrý týraly sheshim qabyldaıdy. Ony árkim árqalaı túsinip jatady. Osy joly erejege taǵy ózgeris engizdi. Endi, atalǵan júıe qanshalyqty ádiletti bolatynyn tek ýaqyt qana kórsetedi. Sondyqtan dál qazir bir nárse aıtý qıyn", - dedi E.Ybyraıymov QazAqparat tilshisine bergen suxbatynda.
Aıta keteıik, jaqynda Halyqaralyq áýesqoı boks qaýymdastyǵy (AIBA) aǵymdaǵy jyly ótetin barlyq jarystarda boksshylardyń upaılaryn jańa ereje boıynsha esepteıtinin málimdedi. Endi upaı sanyna jaýap beretin sýdıalar komıssııasynyń jumysyn jalǵyz komıssııa tóraǵasy ǵana atqaratyn bolady. Ol upaıdy sanaıtyn elektrondy baǵdarlamany tekserip otyrady. Rıngtiń janyndaǵy sýdıalar bolsa, sharshy alańnyń tórt buryshynda otyrady. Al árbir raýndtyń qorytyndysy jekpe-jektiń sońynda ǵana jarııalanady. QazAqparat tilshisine suxbat bergen Rıo Olımpıadasynyń kúmis júldegeri Ádilbek Nııazymbetov te AIBA-nyń erejeni aýystyrýyna qatysty óz pikirin bildirgen bolatyn.
