AIBA nusqaýshylary 13 Azııa eliniń bapkerlerin oqytady
ASTANA. QazAqparat - 29 aqpan men 6 naýryz aralyǵynda Almaty oblysy Talǵar aýdanyndaǵy boks akademııasynda Azııanyń 13 elinen bapkerlerge arnalǵan semınarlar ótedi. Biliktilik sabaǵyn AIBA joǵary bilikti nusqaýshylary Valentın Ostıanov pen Andılı Mofý júrgizedi.
Azııa boks konfederatsııasynyń baspasóz qyzmetiniń habarlaýynsha, bul semınar Qazaqstandyq boks federatsııasymen birlesip qurylyqtyq boks uıymynyń bastamasy boıynsha uıymdastyryldy, ári AIBA bilim berý baǵdarlamasynyń mańyzdy quramdy bóligi.
«Qazirgi ýaqytta Azııa óńirindegi bapkerlik quramnyń jáne sýdıalyq korpýstyń biliktiligin arttyrýǵa múddelimiz. Azııanyń kóptegen ókilderi AIBA-nyń sertıfıkattalǵan mamandary bolsa deımiz. Bilim berý baǵdarlamasy Qazaqstannan bastalǵanyna qýanyshtymyz», - dedi Azııa boks konfederatsııasynyń atqarýshy dırektory Baqdáýlet Tórehanov.
Kýrs sońynda emtıhan bolady, onyń qorytyndysy boıynsha Azııanyń 40 bapkeri, 10-nan astam qazaqstandyq bapker AIBA 1 jáne 2 juldyzdy sertıfıkatyn alady.
